Laing unom ka tawo nga nalambigit sa scam hub nga gironda sa kapulisan niadong Mayo 27, 2025 sud sa usa ka establisamento sa Barangay Kasambagan, Siyudad sa Sugbo ang mag-atubang og kasong criminal.
Sa labing uwahing kalambuan sa pagpadayon sa imbestigasyon nasuta nga ang mga sakop sa Regional Anti-Cybercrime Unit 7 sa pagpangulo ni Police Lieutenant Junmark Caña, Assistant Chief ug Team Leader sa Cebu Cyber Response Team niduso na sa reklamo ngadto sa buhatan City Prosecutor, Department of Justice alas 4 sa hapon, Biyernes, Hulyo 25, 2025.
Ang unom ka bag-ong nailhan nga mga respondent gipasakaan og kasong kalapasan sa Section 11 (Investment Fraud) sa Republic Act 11765 o Financial Products and Services Consumer Protection Act, in relation sa Section 6 sa Republic Act 10175 kun Cybercrime Prevention Act of 2012.
Ang maong reklamo gipasaka sa Cebu Provincial Cyber Response Team ubos sa WSSECD No. 0520-05-2625-07 nga giluwatan ni Hon. James Stewart Ramon Himalaloan ang Presiding Judge sa RTC Branch 7 sa Dakbayan sa Sugbo.
Sila giila lang una sa Police Regional Office sa mga alyas nga silang Smakdat, Dan, Tony, Ann, Nav, ug Jessa.
Matod ni Police Brigadier General Redrico Maranan ang hepe sa Police Regional Office 7 nga ang mga scammer way luna sa Central Visayas ug nisaad nga ang kapulisan mangita kanila ug bisan asa pa sila motago matultolan lang gihapon sila.
“Cyber scammers have no place in Central Visayas. We will find them, charge them, and protect our people”, matod ni Maranan.
Moabot na sa 13 ka tawo nga giingong nalambigit sa operation sa scam hub ang gikiha sa kapulisan./ AYB