Nailhan na sa Abellana Police Station 2 ang mga responsabli sa pagpusil-patay sa usa ka ex-convict sa Sitio Lower Kawayan, Barangay Sambag 2, Cebu City ala 1:30 sa kaadlawon niadtong Lunes, Hunyo 23, 2025.
Ang biktima mao si Macgied Lavistre Villamala, 32, nga bag-o lang nakagawas gikan sa Abuyog Penal Farm sa kaso sa ilegal nga drugas.
Gitug-an ni Police Lieutenant Colonel Maria Theresa Macatangay, deputy city director for operation sa Cebu City Police Office (CCPO), nga utang sa ilegal nga drugas ang hinungdan sa pagpatay basi sa nigawas sa imbestigasyon.
Giingon nga ang unom ka mga mamumuno nakita sa CCTV camera nga nidemanda sa biktima nga ilang kuhaon ang motorsiklo niini isip bayad sa utang sa ilegal nga drugas.
Apan wala mosugot ang biktima nga maoy hinungdan nga gipusil ni hinungdan sa iyang kamatayon.
“Ang purpose sa pagsulod sa mga suspect is to obtain payment again for previous proceeds from the illegal drugs and agi'g bayad mao unta tong pagkuha sa motorcycle but then wala man misugot ang biktima, the reason why naay panagbangi nga mi-result sa pagpamusil,” matod ni Macatangay.
Si Villamala bag-o pa nga nakagawas sa Abuyog Penal farm sa kaso sa ilegal nga drugas apan pipila ka adlaw siya nga nibalik sa iyang panimalay, duna nay nagsige og pangita niini.
Giklaro ni Macatangay nga ang nahitabo sa B. Aranas ug sa Sambag 2 sa Siyudad sa Sugbo way connection bisan pa man nga pulos sila bag-o lang nakagawas sa ilang pagkabilanggo sa Abuyog Penal farm.
Padayon nga nanguha og mga ebidensya ang Abellana Police Station batok sa mga nailhan na nga mga suspek aron mopasaka sila og kaso sa korte. / AYB