Unom ka tawo ang gitakbuyan sa kaso sa glanders, usa ka bacterial disease gikan sa nasakit nga mananap ang natala sa Isla sa Siquijor.
Si Siquijor Governor Jake Vincent Villa, sa iyang Facebook post sa Sabado, Mayo 24, 2025, nagkanayon nga ang mga nasakit nailhan na ug padayong gitambalan.
Ang Glanders usa ka talagsaong zoonotic disease mugna sa bacterium Burkholderia mallei.
Sagad sa maapektuhan ning maong sakit ang mga kabayo, donkeys ug mules, apan motakboy sab sa mga tawo nga dunay direkta nga contact sa masakiton o namatay nga hayop.
Mga Health official nagkanayon nga ang mga natakbuyan sa sakit nakasinati og hilanat, pagpanakit sa dughan, dunay pneumonia, ug skin ulcers.
Human mailhan ang mga natakbuyan, si Villa nagkanayon nga padayon ang surveillance, medical assessments, ug contact tracing.
Gipasalig ni Villa sa publiko nga ang sitwasyon, "very controlled."
“The island of Siquijor remains a safe place for its residents and tourists. We continue in making sure that our community remains safe,” tipik sa FB post ni Villa.
Ang Provincial Government sa Siquijor nakigtambayayong sa Negros Island Region One Health Task Force aron magpabilin ang aktibong surveillance ug management efforts pagpanalipod sa panglawas sa komunidad.
Grupo sa mga healthcare worker ang gipakatap sa kabarangayan aron maseguro ang early detection.
Samtang talagsaon ra kaayo ang human-to-human transmission, ang mga health official padayong nipasidaan sa publiko nga magmatngon ug kanunay nga limpyo sa kaugalingon kon moatiman sa kahayupan.
Giawhag sab ang publiko nga maglikay sa pagpaduol sa kahayupan ug mo-report kon dunay nagmasakiton ug dili mokaon sa karne sa nagmasakiton bisan kini giluto.
Kadtong mga tawo nga makasinati og hilanat, ubo o talagsaong symptoms kinahanglan nga magpakonsulta dayon sa ilang health center. / JJL