Natanggong sa bilanggoan ang unom ka mga sugarol sa hantak atol sa pagronda sa kapulisan sa Barangay Matab-ang, siyudad sa Toledo, alas 6:00 sa gabii, Sabado, Oktubre 26, 2024.
Usa ka tawag sa concerned citizen maoy nagsumbong bahin sa sugal sa dapit hinungdan nga nilusad og operasyon ang kapulisan ubos sa kamandoan sa ilang hepe nga si P/Lt. Col. Wilfredo Alarcon Jr.
Ang nangasikop mao sila si 'Jeffrey', 32, bus conductor, taga Brgy. Matab-ang, Toledo; 'Cepriano, 34, ulitawo, bus conductor, taga Brgy. Matab-ang; 'Junrex, 29, ulitawo, pintor, taga Looc Norte, lungsod sa Asturias; 'Samuel, 38, ulitawo, construction worker, taga Asturias; 'Nelson', 46, minyo, construction worker, taga Brgy. Dumlog, Toledo; ug 'Jorge', 36, minyo, drayber, ug taga Ubogon, Asturias.
Sila nakuhaan og mga ebidensya sama sa tulo ka mga sinsiyo nga antugon, P170 cash sa pusta ug bato nga antugan.
Ang mga suspek mag-atubang og kasong kalapasan sa Presidential Decree 1602 o Illegal Gambling. / DVG