6 patay, 1 missing; gisakyan nabanlas sa baha sa Carmen

6 patay, 1 missing; gisakyan nabanlas sa baha sa Carmen
■ GIBUNLOT: Nagusbat ang Isuzu D-Max nga pick-up /off-road truck nga gimaneho ni Ranilo Hermoso, 44, nga maoy gisakyan sa 17 ka mga pasahero, lakip na sa bag-ong kinasal nga magtiayon, nga gibanlas sa bul-og sa tubig sa sapa sa Mangitngit, Barangay Cantumog, lungsod sa Carmen, Hulyo 8, 2024. Arnold Y. Bustamante
6 patay, 1 missing; gisakyan nabanlas sa baha sa Carmen
■ GIBUNLOT: Nagusbat ang Isuzu D-Max nga pick-up /off-road truck nga gimaneho ni Ranilo Hermoso, 44, nga maoy gisakyan sa 17 ka mga pasahero, lakip na sa bag-ong kinasal nga magtiayon, nga gibanlas sa bul-og sa tubig sa sapa sa Mangitngit, Barangay Cantumog, lungsod sa Carmen, Hulyo 8, 2024. Arnold Y. Bustamante

Wala magdahum ang amahan niadtong mabdos nga niadtong Sabado, Hulyo 6, 2024 lang gikasal nga moresulta sa trahedya ang ilang pagpangaligo og swimming pool sa usa ka mountain resort sa Brgy. Cantucong, bukirang dapit sa lungsod sa Carmen, amihanang Cebu human nabanlas sa kusog nga bul-og sa baha ang ilang gisakyan nga pick up truck.

Si Amadeo Ypil Jr., 47, nanghinaot nga buhi pa ang iyang anak nga na-missing, apan kagahapon sa udto, Hulyo 9, nabangalan ang lawas ni Rhesamie Ypil-Costan, 26.

Pagka alas 6:26 pm, napalgan na sab ang lawas sa bana ni Rhesamie nga si Elmer Costan, 25, base sa pahibawo ni Carmen Mayor Carlo Villamor, sa iyang Facebook page.

Sila si Rhesamie ug Elmer gikasal niadto lang Sabado, Hulyo 6, 2024.

Matod pa ni Amadeo nga didto sila sa Middle Earth Mountain Resort nianang pagka alas 11 sa buntag, Hunyo 8, ug pagka alas 3 sa hapon nimandar na siya sa iyang mga anak nga manguli na.

Una niya nga gipanghatod ang uban niya nga mga anak, apan nibalibad si Rhesamie nga mosakay sa iyang motorsiklo kay didto lang sila sa pick up mosakay sa pagpauli.

Niagi pa siya sa sapa sa Sitio Mangitngit, Brgy. Lower Natimao-an diin linaw pa kini ug dili pa kusog ang bul-og sa tubig bisan kon nagsugod na og uwan.

KALIT

Nakurat na lang siya nianang pasado alas 5 sa hapon nga gipahibawo siya sa ilang silingan nga adunay sakyanan nga naanod sa sapa nga ang mga sakay taga-Cantucong.

Dali siya nga nimaneho sa iyang motorsiklo bisan sa pagbunok sa uwan aron adtuon ang sapa sa Lower Natimao-an.

Iyang nasuta nga apil ang iyang anak nga naanod sa baha.

“Naay among silingan nga miadto sa balay nga nipahibawo nga naa daw truck nga naanod sa baha sa Mangitngit nga ang mga sakay taga Cantucong. Mao to ako dayon gidagan. Mao man gyud diay taga amoa man diay, apil pa akong anak,” matod ni Amadeo.

Sumala pa niya nga kamaguwangan niyang anak si Rhesamie ug nagtrabaho isip kahera sa usa ka pawnshop sa lungsod ug unom ka buwan kini nga mabdos.

Gilusad dayon ang search and rescue operation sa Municipal Disaster Risk Reduction and Management Office sa lungsod sa Carmen inabagan sa mga rescue team gikan sa Danao City ug kasikbit nga lungsod.

PATAY NA

Unang napalgang patay niadtong Lunes sa alas 8 sa gabii, Hulyo 8, si Aishe Hermoso, 12. Siya napalgan sa baybayon sa Carmen.

Sa padayong gihimong search and retrieval operation, nabangalan ang lawas ni Rhesamie sa alas 12 sa udto, Martes, Hulyo 9 sa kadagatan sa Carmen.

Gisundan sa alas 3 sa hapon diin naugkat ang lawas ni Nathaniel Lozano, 12, sa kadagatan sa Catmon.

Base sa gihimong search and retrieval operation, Martes, Hulyo 9 gipahibawo ni Mayor Villamor ang dugang pang lawas nga nakuha: Arshen Bejoc, Elmer Costan ug Clarisse Ypil.

Bugtong ang lawas ni Mike Stanly Tungal, 15, padayon pang gikatahong missing ning pagsuwat.

Kasagaran nga naanod sa bul-og sa sapa kadtong mga nanakay sa luyo nga bahin sa pick up.

Sigun sa mga tawo nga nakasaksi sa hitabo nga kadtong naa sa sulod sa sakyanan, lakip na ang uban nga naa sa luyo, nakasaka sa dako’ng bato maoy naluwas samtang ang uban nangaanod gyud.

Matod ni Jeniver Tapia, residente sa Sitio Mangitngit, nga gibauran pa nila ang drayber nga dili lang una molabang kay kusog pa ang baha.

Apan kompyansa lang ang drayber niini nga daghan og karga ug nagtuo nga dili sila madaug sa tubig nga maoy hinungdan nga nipugos sa paglabang apan natumba ang sakyanan.

Dali nga nangayo og pakitabang ang mga sakay niini apan naglisud na sila sa pag rescue tungod sa kakusog sa bul-og sa tubig.

“Nisungasong gyud ang drayber. Pag-abot sa tunga nabanlas sila sa tubig mao tong naanod. Katong naa sa gawas nga sakay mao to sila ang nangaanod,” asoy ni Tapia.

Matod ni Engineer Rodger Suico, pangulo sa MDRRMO sa lungsod sa Carmen, naundang lang ang search and rescue pagka alas 10 na sa gabii, Lunes.

Nibalik sila sa ilang pagpangita sa mga na missing Martes sa buntag ngadto na sa pasado alas 6 sa gabii sa pamasin nga buhi ni nga nabangalan sa kadagatan sa Carmen ug mga silingang lungsod.

Nigamit na sa ilang mga kahimanan ang Philippine Coast Guard ug disaster management office diin ilang gipangsubay ang sapa lakip na ang kadagatan.

SURVIVOR

Samtang ang mga naluwas mao silang Princess Ann Ypil, 11, Ranilo Hermoso, 44, drayber sa pick up; Debie Hermoso,40; Ainsley Hermoso, 6; Jojelyn Tungal, 39; Mary Jaica Tungal, 16; May Stephanie Tungal, 14; Queen Nicole Sencio, 4; Athea Gica, 4; ug Jasmine Gica, 37, nga pulos taga Barangay Cantucong, lungsod sa Carmen. / AYB, DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph