Usa ka magnitude 6.1 nga linog ang miigo sa kadagatan duol sa Davao Occidental pasado alas 7 sa buntag Sabado, Hunyo 28, 2025.
Hinuon wala makatala ang Philippine Institute of Volcanology and Seismology (Phivolcs) og makaguba nga hulga sa tsunami ang maong pagtay-og.
Ang epicenter sa maong linog natala nga anaa sa 79 ka kilometros ang gilawmon ug anaa miigo 85 kilometros sa habagatang sidlakan sa Sarangani Island sa Davao Occidental.
Miigo kini alas 7:07 sa buntag ug nasinati ang Intensity 5 sa Glan and Malungon, Sarangani; ug Pantukan, Davao de Oro.
Intensity 4 usab ang nasinati sa Alabel, Kiamba, ug Malapatan sa Sarangani; General Santos City; Tupi ug Koronadal City sa South Cotabato; Davao City, ug Santa Cruz, Davao del Sur; Jose Abad Santos, Davao Occidental; ug Monkayo, Davao de Oro.
Natala usab ang Intensity 3 sa Maasim ug Maitum, Sarangani; Banga, Tampakan, Surallah, ug Polomolok, South Cotabato; Maco ug Nabunturan, Davao de Oro; ug Matanao ug Magsaysay, Davao del Sur.
Natay-og usab ug nasinati ang Intensity 2 sa Tantangan ug Norala, ug Santo Niño sa South Cotabato.
Matod sa Philvolcs nga bisan og walay hulga sa tsunami, “earthquakes of this size may generate unusual sea level disturbances that may be observed along coasts near earthquake epicenter of Davao Occidental and nearby provinces.”
Pipila ka aftershocks ang nasinati human ang magnitude 6.1 nga linog apan walay natala nga kadaot ang maong pagtay-og. / LRM