Mokabat sa 61.19 ka tonelada nga basura ang nakolekta sa dihang gipahigayon ang 16th City Wide Cleanup Drive Initiative sa Sabado, Hunyo 22, 2024. Unom ka mga sapa ang una nga gitumong sa pagpanglimpyo.
Sa pakighinabi sa kadagkoan sa Cebu City Environment and Natural Resources Office (Cenro), si Reymarr Hijara nipresentar og dokumento nga nagpakita nga kinahanglang limpyuhan ang Kinalumsan River, Guadalupe River, Estero de Parian, Lahug River, Mahiga River, ug Butuanon River.
Si Paul Gelasque, assistant head sa Department of Public Services, ni-text nga 61.19 ka tonelada ang kinatibuk-ang volume sa basura nga nahipos sa alas 2:30 sa hapon sa Sabado.
Ang City Wide Cleanup Challenge usa ka quarterly nga kalihukan nga ipailalom sa tanang mga kawani sa kagamhanan sa dakbayan sa Sugbo.
Si Robert Barquilla, pangulo sa Office of the City Market, niingon sa buwag nga phone interview nga ilang tumong mao ang paglimpyo sa mga sapa aron mamenosan ang pagbaha.
“Tanang empleyado nako sa market, gi-compulsory nako nga mo-attend sa clean-up,” dugang ni Barquilla.
Matod ni Barquilla nga ang iyang departamento ug ang City Planning department nadestino sa Estero de Parian Creek duol sa Cebu Technological University (CTU).
Nagsugod sila alas 5 sa buntag ug nahuman alas 10 sa buntag. Nagtuo si Barquilla nga ang Office of the City Markets ug City Planning departments nakatigom sa kinatibuk-ang 100 ka sako sa basura nga nakolekta.
Gipadayag usab ni Barquilla nga gawas sa pagpanglimpyo lang sa mga sapa, laing tumong nila mao ang pagbadlong sa mga residente, bisan pa kon ang City Environmental Sanitation & Enforcement Team (CESET) maoy nagdumala sa programa sa pag-lecture sa mga indibidwal nga panagsa ra maglabay og basura.
“Naa gyud mga balay nga daplin sa sapa, ato lang gi remind nga ayaw tawon mo panglabay sa sapa kay mobalik rana sa atoa,” matod ni Barquilla.
Nalipay si Barquilla nga gipadayon ni Acting Mayor Raymond Alvin Garcia ang inisyatiba sa usa ka synchronized cleanup drive sulod sa dakbayan sa Sugbo. / JPS