Hugot nga gipahimangnuan sa Commission on Elections (Comelec) ang kapin sa 800 ka kandidato sa Sugbo nga wala pa makasumiter sa ilang Statement of Contributions and Expenditures (Soce) nga mameligro sa diskwalipikasyon ug legal nga silot kay usa na lang ka adlaw sa dili pa ang Hunyo 11 nga deadline.
Sumala sa Comelec Central Visayas, 444 lang sa 1,268 ka kandidato sa Sugbo ang nakasumiter sa ilang Soce hangtod sa Lunes, Hunyo 9, 2025.
Gikumpirmar ni Comelec Director Atty. Francisco Pobe ang maong mga gidaghanon atol sa usa ka interbyu sa telepono sa SunStar Cebu.
Matod ni Pobe nga sa Bohol, 395 ka kandidato ang nakasumiter, layo ra sa 1,117 ka elective posts nga gipapilian sa Mayo 12 nga nasudnon ug lokal nga eleksyon.
Ang Soce usa ka mandatory nga report nga gikinahanglan sa tanang kandidato ug political parties nga nagdetalye sa mga donasyon sa kampanya, cash ug in-kind, ingon man ang tanang galastuhan nga may kalabutan sa eleksiyon.
Kini nagsilbing usa ka importanteng sukdanan sa transparency sa balaod sa eleksiyon sa Pilipinas.
Sa Dakbayan sa Lapu-Lapu, duna nay 27 ka lokal nga kandidato ang nakasumiter sa ilang Soce sumala ni Lapu-Lapu City Election Officer Atty. Ann Janette Lamban.
Napulo sa 37 ka lokal nga kandidato ang wala pa makasunod sa filing requirement.
Si independent mayoral candidate Cristine Takahashi ang unang nakasumiter niadtong Mayo 22, gisundan ni kanhi mayor Paz Radaza niadtong Hunyo 3.
Ang mga bise mayor nga kandidato nga sila Celedonio Sitoy ug Atty. Michael Dignos nakasumiter sa ilaha niadtong Hunyo 5 ug 6, matag usa.
Ang tanang 12 ka napiling konsehal sa siyudad gikan sa Team Kaabag slate nakasumiter sa ilang mga report tali sa Hunyo 5 ug Hunyo 9, apil sila Ariane Neil Marie Yap, Emilio Galaroza, Jan Vincent Dela Serna, Climaco Tatoy, Jeorgen Book, Efren Herrera, Annabeth Cuizon, Linda Susan Baring, Joseph Pangatungan, Celestino Aying, Marciano Alforque Jr., ug Rufo Bering.
Dugang ni Lamban nga 11 ka ubang mga aspiring Sangguniang Panglungsod nga kandidato ang nakasumiter sa ilang expense reports.
Mga mahitabo sa di makasumiter
Gipasidan-an ni Pobe nga ang mapakyas sa pagsumiter sa Soce sa deadline sa Hunyo 11 mahimong mosangpot sa administratiba ug kriminal nga mga kaso, ug sa pag-report ngadto sa main office sa komisyon sa Manila.
Giawhag ni Pobe ang tanang kandidato sa pagtuman dayon aron malikayan ang mga komplikasyon nga may kalabutan sa ilang kandidatura. / DPC