Gipasidunggan sa kagamhanan sa Dakbayan sa Lapu-Lapu ang 67 ka board ug licensure exam passers.
Matag usa, nakadawat og tag P5,000 ug sertipiko pag-ila sa ilang kalampusan nga naghatag og dungog sa Siyudad.
Niadtong Huwebes, Enero 23, 2025, si Mayor Junard “Ahong” Chan maoy nangunay sa pagtunol sa pasidungog didto sa Mayor’s Conference Room.
Ang mga nakadawat mao ang mga nakapasar sa nagkalainlaing kurso nga naglakip sa civil engineering, education, nursing, chemical technology, ug naval architecture.
Sa iyang Facebook post, ang mayor niingon nga ang pagpasidungog sa mga nakapasar sa board ug mga licensure exam makahatag og kadasig sa ubang mga tinun-an nga maningkamot ug mosentro sa ilang pagtuon.
Gipasalig sa mayor nga ipadayon sa Siyudad ang pagpasidungog aron ang mga tinun-an maningkamot gyud sa ilang pagtuon.
“Nakadawat og malabo nga P5,000 ang 67 ka mga Oponganon nga mga board passers sa lain-laing mga licensure exams. Ang ilang pagpasar usa ka grasya para kanatong mga Oponganon tungod sa pagdala og dungog ug garbo sa atong pinalanggang siyudad. Maong makiangayon lang nga madawat nila kining P5,000 nga incentive para kanila,” nagkanayon si Chan.
Mga aplikante nga mga lumolupyo sa Dakbayan sa Lapu-Lapu City kinahanglan nga mo-submit sa gikinahanglang mga dokumento ngadto sa buhatan sa Mayor sa second floor sa City Hall aron makapahimulos sa maong programa.
Ang mga dokumento sama sa barangay residency certification, passing certificate gikan sa Professional Regulation Commission, request letter ngadto sa mayor, updated voter’s certificate, ug photocopy sa valid identification card.
Ang pagpanghatag sa cash incentives gitugot sa City Ordinance 14-095-2017 ug Resolution 14-2138-2017 nga naghatag og pahalipay sa mga board exam passer. / DPC