Bisan sa gibati nga trauma, gipugos sa 68 anyos nga lalaki ang iyang kaugalingon nga magpatuli sa gitanyag nga ‘Libreng Tuli’, ang tinuig nga medical outreach program sa kagamhanan sa Dakbayan sa Lapu-Lapu niadtong Huwebes, Mayo 22, 2025, nga gipahigayon sa Hoops Dome, Barangay Gun-ob.
Nadasig ang maong senior citizen nga gitago sa alyas nga Noy Iking nga magpatuli human nisaad si Lapu-Lapu City Mayor ug Congressman-elect Junard Ahong Chan nga mohatag og cash incentives niadtong mga hamtong nga p*sot nga magpatuli.
Asoy ni Noy Iking nga naengganyo siya nga magpatuli sa dihang ang ilang barangay opisyal nagpahibalo sa mga residente kalabot sa maong programa, dungan sa saad nga kadtong taas na og edad nga magpatuli, makadawat og cash incentive gikan ni outgoing Mayor Chan.
NGANONG DUGAY
Gisaysay ni Noy Iking nga gibati siya og kahadlok kaniadto sa dihang nag-edad pa og 14 anyos diin naglinya na siya uban sa iyang mga igsuon nga magpatuli apan nikaratil og dagan sa dihang ‘hapak’ maoy paagi sa pagtuli kaniadto ug magkadugo ang mga gipangtuli.
Igo lang puston ang samad sa inusap nga udlot sa bayabas nga maoy nagsilbing tambal.
Apan kagahapon, Mayo 22, wala na siya magpadala sa iyang kahadlok, iyang gibaktas ang Hoops Dome, Barangay Gun-ob diin gipahigayon ang Lib-reng Tuli gikan sa Barangay Calawisan nga adunay gibana-bana nga gilay-on nga 7.6 kilome-ters tungod kay wala siyay ikaplite sa PUV.
“Magpa-circumcised gyud ko, aron masulbad akong problema,” pamahayag ni Noy Iking sa mga tigbalita nga niapong kaniya.
Human sa maong operasyon, personal nga gitunol ni Mayor Chan ang P20,000 nga gikan sa iyang personal nga panudlanan.
Alang ni Noy Iking, nasulbad ang iyang problema tungod kay ang maong kantidad maoy iyang kuhaan sa bayad sa kuryente human siya naputlan kay tulo ka buwan nga wala mabayri.
NAKAPATULI NA SAB
Gawas ni Noy Iking, adunay duha ka 21 anyos nga pulos mga mentally challenged, 23 anyos nga construction worker ug ang 34 anyos nga sakop sa LGBTQ. Silang upat ang nakadawat og tag-P10,000 nga cash incentives.
Sa maong programa nga gipaluyohan sab sa buhatan ni Kongresista Cindi King-Chan, City Health Office, City Hospital ug Sta. Rosa Community Hospital nga nagtinguha nga 1,000 ka mga kalakin-an ang makapatuli.
Samtang usa ka 31 anyos ang gibalibaran sa doktor human namatikdan nga tuli na kining daan pinaagi sa ‘hapak’ ug aduna pay bulitas ang kinatawo. / FVQ