68 anyos napalgang patay sud sa pansayan

Usa ka 68 anyos nga lalaki nakaplagan nga patay sud sa pansayan samtang nagpagawas sa hugaw sa lawas sa Villa Del Rio 2, Barangay Pit-os, Siyudad sa Sugbo, alas 9:50 sa gabii, Lunes, Oktubre 14, 2024.

Si Ponciano Salar Belandres, minyo ug usa ka caretaker sa maong subdivision, nakit-an sa iyang anak nga si Arlene nga naglingkod sulod sa pansayan nga natuwad ang ulo sa yuta.

Ang unang niresponde sa dead person alarm mao ang kapulisan sa Police Station 8, uban sa medical team sa ERUF, nga nikompirmar nga patay kini sa ilang pag-abot sa maong dapit.

Nisunod usab ang mga imbestigador sa Scene of the Crime Operation (Soco) sa paghimo og dugang proseso sa lugar aron makuhaan og mga litrato sa ebidensya alang sa dugang imbestigasyon sa kamatayon sa maong senior citizen.

Wa pa matino sa taho kon duna siyay gihambin nga sakit hinungdan nga sutaon kini sa dugang imbestigason sa kapulisan. / DVG