Patay na nga nadangat sa Tuburan District Hospital ang usa ka 57 anyos nga ginang samtang kritikal ang iyang 33 anyos nga anak lalaki human sila panigbasa sa iyang 69-anyos nga kapuyo gamit ang sundang sa alas 3 sa kaadlawon sa Lunes, Mayo 13, 2024 sa Purok Lubi, Brgy. Maghan-ay, bukiran sa lungsod sa Tuburan, probinsya sa Sugbo.
Selos ang naestablisar nga motibo sa pagpanigbas ug gani, gibuwagan diay sa ginang ang suspek tungod niini sayo ning tuiga.
Ang gideklarar nga patay nang niabot sa tambalanan mao si Leonila Maguate, kinsa nakaangkon og dakong samad tinigbasan sa nawong ug liog samtang angol usab ang iyang anak nga si Felix Maguate Rebanuel Jr., alyas Jun-Jun, kinsa samdan sa ulo, bukton, kamot ug ubang bahin sa lawas.
Ang suspek mao si Felix Marquez Rebanuel Sr., nga nagpuyo ra usab sa maong barangay.
Giingong nadala usab sa tambalanan ang suspek human nagdunggab sa iyang tiyan sa dihang ning-abot ang mga polis aron pagdakop kaniya.
Matod sa anak babaye sa biktima nga si Maria Gina Rebanuel, 31, alyas Denden, nga samtang natulog ang iyang inahan sa kwarto, kalit lang nga gisulod sa suspek ug dayon gitigbas ang ulo ug liog gamit ang sundang.
Gisaysay ni Denden nga atol sa hitabo nangatulog ang iyang inahan ug si Jun-Jun.
Nakamata ang iyang maguwang ug sa pagsusi unta niini, siya na usab ang gitigbas sa ilang amahan.
Matod ni Denden nga usa ka tuig na nga nagbuwag ang iyang mga ginikanan tungod kay kanunay sila mag-away gumikan sa selos sa suspek.
Bisan kinsa na lang ang dudahan sa ilang amahan nga giingong karelasyon sa ilang inahan busa nakahukom na ang iyang inahan nga buwagan ang ilang amahan.
Bisan ang mga batan-on nga barkada sa iyang anak nga moestambay sa ilang balay selosan usab niini kay kuno dunay relasyon sa ilang inahan, dugang ni Denden.
Dinhi na nagsugod nga nanganti ang suspek nga iyang patyon ang biktima kon masakpan nga duna kini laing lalaki nga gikarelasyon.
“Kani sila, Sir, dugay na ni silang buwag mga tuig na kapin. Unya kini akong amahan magsige gihapon og ari sa among balay. Nangante nana siya tungod man gud aning selos-selos. Halos tanan namong mga silingan gipangselosan, apil mga batan-on,” asoy ni ni Denden sa interbyo sa Superbalita Cebu.
Gani niabot na sila sa barangay aron mahusay ang iyang mga ginikanan apan mobalik na usab sa naandan nga mao ang pagpangabubho.
Ipanabi pa sa suspek ngadto sa ilang mga silingan nga daghan og laki si Leonila.
Giangkon usab ni Denden nga ang iyang amahan dunay gisunod nga tulomanon sa kulto nga mao ang pagpangamuyo pinaagi sa linatin nga pulong.
Nagtuo siya nga nausab na ang batasan sa iyang amahan samtang nagsunod sa tulomanon sa kulto.
‘MIANGKON’
Si Felix Sr. niangkon nga ang hinungdan sa iyang pagpatay sa iyang kapuyo mao ang pagpangabubho.
Nagsugod ang ilang away niadtong Disyembre sa miaging tuig diin iyang naabtan si Leonila gikan siya nananom og kamote nga dunay timailhan nga nakighilawas og laing lalaki.
“Naa man guy milagro nga nahitabo nga pagtan-aw nako ana ____________. Giingnan nako siya nga naunsa man ning milagro nga nahitabo nimo? Kon ni-a ko, kitay magdug. Ug wala ko, magpadu’g diay kag lain? Ingon man siya nga angkunon ko na. Wala kay katungod nga magpugong nako kay dili ta kinasal,” alegar ni Felix Sr. atol sa interbyo.
Dunay panahon nga iyang kalit lili-on sa bangag sa balay ug iyang makita ang gibuhat sa iyang kapuyo nga dunay ka relasyon nga batan-ong lalaki.
Tungod sa gibuhat ni Felix Sr. sa pagsige og selos ug pamasangil nga way basehanan, gihulga na siya nga ikiha ni Leonila sa barangay.
“Wala man gyud unta koy plano nga koan. Giingnan man ko nga madunot gyud ka sa prisohan. Ah, puslan man nga mapriso ko, kakapoy sa prisohan maypag mangamatay ta,” matod niya.
Nakahukom ang duha nga magbuwag sila niadtong Enero 4, 2024 apan bisan nagbuwag, kanunay niya nga panid-an ang iyang kapuyo.
Si Police Lieutenant Colonel Glenn Hife, chief of police sa Tuburan Police Station, nagkanayon nga kasong murder ug frustrated murder ang ilang ipasaka nga kaso batok sa suspek.