Sa edad nga 7 anyos, nasinati na ni Mavis Jayden Rogado Dumdum ang katam-is nga makalabni og tropeyo gikan sa usa ka international competition sa natad sa paugnat sa kusog.
Nahitabo kini dihang naangkon sa Grade I student sa St. Louis College Cebu sa Mandaue City ang ikaupat nga puwesto sa open male 6-7 yrs. old category sa 2024 Academic Children’s Pushbike Invitational Competition sa Hong Kong niadtong Marso 31, 2024.
Si Dumdum, kinsa sakop sa ARK Philippines team, milupig sa uban niyang kaparang gikan sa nagkalainlaing nasod sa Asya.
Human sa Hong Kong event, nagkanayon ang inahan ni Dumdum nga si Ninna nga nibanat dayon pagbalik sa ensayo ang iyang anak alang sa mas dakong kompetisyon – ang M8 International Pushbike Competition nga gikatakda karong Mayo 4-5 sa Malaysia.
Gipasabot ni Ninna nga ang Hong Kong event nagsilbeng qualifying alang sa Malaysia tournament.
“Ang Malaysia mao gyud na ang tig-organize og dagkong pushbike competitions. So, after sa Hong Kong, nag-training dayon siya (iyang anak) para sa Malaysia,” matod ni Ninna.
Gipasabot ni Ninna nga mas nadasig ang iyang anak ning higayuna nga nakabaton na kini og tropeyo.
“Kaduha na siya nakaapil og international competition pero sa Hong Kong ra siya naka-trophy,” pasabot ni Ninna. / ESL