Gibana-banang moabot sa P225,000 ang danyos sa sunod sa kabalayan samtang tulo ka indibidwal ang naangol sa nahitabong sunog sa Sityo Kiosko, Barangay Basak Pardo, Dakbayan sa Sugbo, alas 4:00 sa kaadlawon, Biyernes, Agusto 21, 2026.
Mokabat sa pito ka balay ang hingpit nga naugdaw samtang usa ang partially damaged o nakan-an sa kayo. Ang maong insidente nakaapekto sa 21 ka pamilya o dul-an 70 ka indibidwal.
Base sa imbestigasyon sa Cebu City Fire Station, ang mga naangol mao sila si Yzabela Miguel Cabase, 14; Dani Mae Cabase, 48; ug Hubert Gabiana, 59.
Gikataho nga nagsugod ang kayo sa duha ka andana nga balay sa pamilyang Cabase.
Matod ni Gabiana, uyoan sa tagbalay, nabantayan sa iyang pag-umangkon nga sa wire sa ilang refrigerator nagsugod ang kayo diin posibleng aduna kini napanit nga bahin.
Sa pamahayag ni Barangay Basak Pardo Kapitan Jun Tumulak, padayon pa ang ilang pag-assess sa mga apektadong molupyo nga kasamtangang nagpabilin sa Villa Zacati Gym.
Matod niya, posibleng mosaka pa ang gidaghanon sa mga apektado.
Nag-apud-apod na ang barangay og mga modular tent ug uban pang unang panginahanglan para sa mga biktima. /
