Pito ka motorsiklo nga nag-parking sa parking area sa Il Corso, North Parking Area sa South Coastal Road, Barangay Mambaling sa dakbayan sa Sugbo, ang nangadanyos human gidaro sa nag-wild nga SUV alas 9:20 sa gabii, Sabado, Hulyo 26, 2025.
Sa imbestigasyon sa Traffic Enforcement Unit sa Cebu City Police Office, nga samtang padulong na nga mo-abante gikan sa parking area ang SUV nga gimaneho ni alyas Sheryl, 45, taga Barangay Lahug sa siyudad sa Sugbo, kalit lang nga nag-wild ang makina niini.
Bisan unsaon sa pag-brake matud pa nga misutoy kini sa pagdagan tungod sa pag-accelerate ug padung kini sa mga nagtapok nga tawo.
Aron dili maigo ang mga tawo, gilubag sa driver ang manobela paingun sa walang bahin ug didto kini midaro sa mga nag-parking nga motorsiklo.
Tungod sa kakusog sa impact, pulos nakaangkon ug daku nga danyos ang pito ka motorsiklo lakip na ang SUV.
Kasamtangan nga gikustodiya sa TEU ang driver sa SUV og mag-atubang og kasong Reckless Imprudence Resulting to Multiple Damage to Property. Apan misaad matud pa ang nakabangga nga siya ang moabaga sa tanan nga gasto sa danyos sa maong mga motorsiklo. / AYB