Naghangyo og permit ang Don Vicente Rama Memorial National High School sa Barangay Basak San Nicolas aron putlon ang pito ka punoan sa kahoy nga maigo sa tukoron nga 12-storey school building.
Kini suma sa usa ka inspection report sa Cebu City Environment and Natural Resources Office (Ccenro).
Ang eskwelahan, pinaagi sa School Principal IV nga si Rosemarie Novabos, nagsumiter og hangyo sa Ccenro niadtong Hulyo 22, 2026, agi og pagsunod sa iyang suwat niadtong Hulyo 15 nga nangayo og permit aron maputol ang mga kahoy sulod sa eskwelahan sa Macopa Street.
Naghimo og ocular inspection ang Ccenro niadtong Agusto 5, human madawat ang maong hangyo.
Sa maong inspeksyon, aduna’y 11 ka nagkadaiyang kahoy nga naila sulod sa eskwelahan.
Gikan sa 11 ka kahoy, girekomendar sa Ccenro nga pito ang putlon, tulo ang iapil sa design sa edipisyo, ug duha ka punoan sa abokado ang i-earth-ball para ibalhin. / CAV