NABALHOG sa Cebu City Police Office (CCPO) custodial facility ang 70-anyos nga mag-uuma human malutsan og warrant of arrest sa duha ka ihap sa kasong qualified rape nga walay piyansa nga gitugot sa korte.
Ang akusado giila sa alyas nga Enting, residente sa Barangay Busay, bukirang dapit sa Siyudad sa Sugbo.
Nadakpan siya sa tracker team sa City Investigation Detective and Management Unit sa CCPO alas 12:40 sa hapon, Huwebes, Hulyo 3, 2025, sa Barangay Bonbon, laing bukirang dapit sa Dakbayan sa Sugbo, pinasikad sa warrant of arrest nga giluwatan ni Judge Ester Veloso ang Presiding Judge sa RTC 7 Branch 6 sa Dakbayan sa Sugbo pinetsahan niadtong Hunyo 3, 2025.
Si alyas Enting nabutang sa listahan sa CCPO nga Top 1 most wanted person sa provincial level.
Nasayran sa imbestigas-yon sa kapulisan nga ang iyang kaugalingon anak nga 6 anyos ang iyang gibiktima niadtong Marso 26, 2024, sa alas 8:00 sa gabii.
Sigon sa impormasyon sa korte nga gigamitan og kusog ug pagpanghadlok sa akusado ang iyang anak nga iya kining kutloan sa kinabuhi kon dili mosanong sa iyang lawasnon nga tinguha ug kon motug-an sa gihimo niini ngadto sa biktima.
Ang anak mismo ni Enting ang nipasaka og kaso human matod pa kini niya lugosa sa makaduha kahigayon.
Sa pagsusi sa prosecution, nasuta nga bisan sa kalinghod sa pangedaron sa biktima, nasayod siya sa gihimo sa iyang amahan nga nakahimo kini sa pagpangabuso kaniya. /AYB