Sulod lang sa kapin lima ka buwan ang kapulisan sa Probinsya sa Sugbo nakasikop og 726 ka wanted persons gikan Enero 12, 2025 ngadto sa Hunyo 2, 2025.
Sa datus nga gipahibawo sa Cebu Police Provincial Office (CPPO), nakalusad sila og 726 ka operation pag-serve sa 876 ka mga warrant of arrest niadtong mga akusado nga dunay pending warrant of arrest.
Sa 726 ka pinangita sa balaod 82 niini nabutang isip most wanted persons ug 644 ang wanted persons ug usa ang nakalas atol sa police operation.
Si Police Colonel Jovito Atanacio ang hepe sa CPPO nihulagway nga malampuson sila sa ilang kampanya sa paggukod sa mga labing pinangita nga tawo sa balaod sa probinsya.
Iyang gidayeg ang mga personnel sa CPPO sa ilang maayo nga performance ug ang ilang dedikasyon sa trabaho aron magpabilin ang kalinaw ug kahusay sa mga lungsod ug siyudad sa probinsya.
“From January to early June, our men and women have worked tirelessly to track down fugitives. These numbers are not just statistics, they represent our commitment to protecting the people of Cebu Province and sending a strong message that the law will always catch up with those who try to escape it. Under my leadership, we will continue to push forward and ensure that Cebu Province remains a safe place for every resident.” matod ni Atanacio.
Gumikan sa subsob nga operation sa kapulisan nahimong malampuson ang piniliay karong tuiga matod ni Atanacio. / AYB