Patay nang nadangat sa Badian District Hospital ang usa ka 72 anyos nga lolo human gidunggab sa iyang silingan nga hubog, alas 9:35 sa gabii, Miyerkules, Abril 24, 2024, sa Sityo Dulong-Dulong, Brgy. Dagatan, lungsod sa Badian.
Ang biktima giila nga si Andres Cagang Palagtiosa, 72, minyo, samtang ang suspek mao si Darwin Omabac Hitutua, hamtong, ulitawo, iyang silingan.
Sa pasiunang imbestigasyon ni P/Master Sgt. Joeffry Badilles ubos sa kamandoan sa ilang hepe nga si P/Capt. Jerwin Mark C. Battung, ang biktima ug suspek nagkasabot nga motambong sa death anniversary sa pag-umangkon sa biktima sa Brgy. Malhiao.
Ang biktima niangkas sa motorsiklo sa suspek ug sa dihang didto na sa dapit, nanag-inom sila. Ug bunga sa ilang kahubog, nagkalalis sila sa wa masayri’ng hinungdan.
Human nagkauli ang duha, ang biktima niangkas gihapon sa motorsiklo sa suspek ug ang biktima gipakanaug sa ilang balay samtang ang suspek nipauli.
Apan pipila ka gutlo, nitumaw ang suspek sa balay sa biktima nga nagdala na og mahait ug talinis nga hinagiban ug gidunggab ang biktima sa wa’ng dughan ug tiyan.
Ang biktima gidali pagtabang sa iyang anak ug gidala sa Badian District Hospital apan gideklarar nga dead on arrival sa attending physician nga si Dr. Kriss Avril T. Opada.
Ang suspek nga nadakpan sa kapulisan sa Badian pasakaan og kasong homicide. / DVG