Nakabsan sa kinabuhi ang ang 74 anyos nga biyuda sa sunog sa iyang balay sa alas 6:10 sa gabii sa Lunes, Abril 15, 2024 sa Sityo San Isidro, Barangay Poblacion, lungsod sa Sogod, amihanang Sugbo.
Ang biktima giila nga si Socorro Arnado Go-od, kinsa namatay alas 12 sa kaadlawon sa Martes sa Vicente Sotto Memorial Medical Center (VSMMC).
Si FO1 Mark Joseph Ylanan, sa BFP-Sogod nga nahinabi sa Superbalita Cebu, nagkanayon nga ang biktima nag-inusara nga nagpuyo sa iyang payag nga ginama sa amakan.
Gihulagway nga bedridden na si Go-od ug hatagan lang og pagkaon sa iyang mga anak nga nagpuyo duol ra sab.
Paspas nga nikatap ang kayo samtang ang biktima diha ra sud sa nagdilaab nga payag, apan natabang siya sa mga bombero, giyayungan og alsa.
Nakaangkon og third degree burns sa iyang kalawasan ang biktima hinungdan nga gidali sa pagdala sa tambalanan sa maong lungsod, apan gibalhin sa VSMMC sa dakbayan sa Sugbo.
Wala isalikway sa nagpadayong imbestisgasyon nga posible nga short circuit sa linya sa kuryente ang hinungdan sa sunog.
Ang sunog giisa sa first alarm ug wa na makakatap pa sa laing istruktura. Gibana-bana nga mokabat sa P50,000 ang danyos sa sunog. / GPL