Usa ka 75 anyos nga lolo ang nadiskubrehan nga naghapa sa baybayon sa Lower Kulasi, Barangay Bonbon, lungsod sa Aloguinsan, alas 6 sa gabii, Martes, Abril 2, 2024.
Ang namatay giila nga si Maximo Geniga Ohagan, 75, biyudo, fish vendor ug molupyo sa naasoy nga dapit, kinsa gidala sa Rural Health Unit sa lungsod apan gideklarar nga dead on arrival (DOA).
Sa pakighinabi sa Superbalita ngadto kang PCapt. Jose Dante Talandron, hepe sa kapulisan sa Aloguinsan, sigon niya, nakit-an ang lolo sa usa ka batan-ong lalaki nga nalup-og na ug way panimuot sa baybayon sa maong dapit hinungdan nga iyang gitabang.
Sa imbestigasyon sa kapulisan, nasuta nga si Ohagan napaakan og iro sa miaging tulo ka adlaw ug bag-ong gihatagan og injection sa anti-rabies.
Matod pa, gitambagan sa kini sa iyang anak nga babaye nga mopahuway lang una apan wa kini mopatuo ug niadto na hinuon sa dagat ug naligo.
Ug nadiskobrehan na lang kini sa sayong gabii nga wa nay panimuot sa baybayon nga dunay samad sa ulo tungod sa pagparok sa bato.
Matod ni Talandron, bisan ilang nasuta nga way foul play ang kamatayon niini, ang kabanay ilang gitambagan nga ipa-autopsy kini. / DVG