Nasulod na sa NBA playoffs ang Philadelphia 76ers human nila gipukan ang Miami Heat sa makapakitbi sa atay nga duwa 105-104 sa Huwebes, Abril 18, 2024 (RP time) sa Philadelphia.
Gipakita ni Joel Embiid kon ngano nga ang Philadelphia kanunay nga makakombate sa usa ka taas nga postseason run basta naa siya sa lineup.
Si Embiid adunay 23 puntos, 15 ka rebounds ug usa ka mahinungdanon nga assist kang Kelly Oubre Jr. sa usa ka go-ahead nga three-point play nga maoy nigiya sa 76ers ngadto sa 105-104 nga kadaugan batok sa Miami Heat sa Eastern Conference play-in tournament .
Nakuha sa 76ers ang No. 7 seed ug niabante aron moduwa sa second-seeded nga New York Knicks sa opening round sa Eastern Conference playoffs.
Ang Game 1 karong Dominggo (RP time) sa Madison Square Garden.
Hinuon, duna pay purohan ang Heat nga masulod sa playoffs kay makigsangka sila sa Chicago Bulls alang sa no. 8 seed.
Gipukan sa Bulls ang Atlanta Hawks, 131-116, sa pagpangulo ni Coby White sa iyang career-high 42 puntos.
Si Nikola Vucevic nitali og 24 puntos ug 12 ka rebounds alang sa Chicago. Si DeMar DeRozan nitapos sa duwa nga dunay 22 puntos ug siyam ka assists.
Gipangulohan ni Dejounte Murray ang Atlanta sa iyang 30 puntos ug siyam ka assists. / REV, AP