Usa ka senior citizen nga biyuda ang naangol human kini natumba dihang gi-snatch ang iyang bag sa usa ka lalaki mga alas 6 sa buntag sa Dominggo, Hunyo 15, 2025 sa may dan P. Del Rosario, Barangay Kamagayan, Dakbayan sa Sugbo.
Ang kawatan nailhan lang sa alyas nga Janjan, 28 anyos, ulitawo ug lumad nga taga Negros apan temporaryong nagpuyo sa Sitio Bato, Barangay Ermita sa siyudad sa Sugbo.
Samtang ang biktima giila lang sa alyas nga Nay Coring, 77 anyos nga taga Barangay Sto. Niño ning maong dakbayan.
Kasamtangan pang nagpa-alim sa tambalanan ang biktima tungod sa mga pangos nga iyang naangkon.
Base sa imbestigasyon sa Parian Police Station, naatlan sa mga nag-roving nga mga sakop sa Mobile Patrol Unit (MPU) sa Cebu City Police Office (CCPO) ang suspek sa aktong pagpanglabni sa bag sa biktima hinungdan nga ila kining gisikop.
Narekober sa kapulisan ang bag sa biktima nga adunay mga gamit nga ang tanan gibana-banang nagkantidad og P5 mil.
Kasamtangan’g gitanggong sa Parian Police Station ang suspek nga mag-atubang og kasong pagpangawat ug physical injury. / JDG