NAKABSAN sa iyang kinabuhi ang 79-anyos nga drayber sa motorsiklo human nibangga sa naghunong nga Kia Picanto samtang naka-stop signal sa dalan Katipunan, Barangay Labangon, Dakbayan sa Sugbo alas 9:30 sa gabii, Dominggo, Hulyo 27, 2025.
Ang namatay giila nga si Roberto Morgia Dabon, 79, residente sa Rizal Street, Siyudad sa Mandaue.
Sa imbestigasyon sa Traffic Police Unit sa Cebu City Police Office, nasayran nga nagsubay sa susamang direksyon ang Kia Picanto nga gimaneho ni Tomas Peliño, 48, taga Barangay Mactan, Siyudad sa Lapu-Lapu.
Pag-abot sa dalan Katipunan, nihunong si Peliño tungod kay naka-stop signal ang traffic light apan kalit lang matod pa nipaka ang luyo nga bahin sa iyang sakyanan human kini gibanggaan sa motorsiklo nga gimaneho sa biktima.
Tungod sa kakusog sa impact, nalagpot si Dabon uban sa iyang angkas nga 14-anyos ug pulos sila nabundak sa sementado nga karsada.
Dali nga gidala ang biktima ug ang iyang angkas sa Cebu City Medical Center apan gideklara nga dead on arrival ang 79-anyos.
Samtang ang iyang angkas anaa sa luwas nga kahimtang.
Gidala si Peliño sa buhatan sa TEU apan gibuhian ra sab sanglit andam nga makigsabot ang pamilya sa nakalas ug dili na kini mokiha pa. / AYB