Patay nang nadangat sa tambalanan ang 8 anyos nga lalaki nga nalumos sa Luyang Spring, Barangay Obong, Lungsod sa Dalaguete, habagatang Sugbo sa Dominggo, Hunyo 9, 2024.
Ang insedente nahitabo nianang pagka alas 12:30 sa hapon apan na-report sa kapulisan sa alas 9:20 sa gabii sa maong adlaw.
Ang biktima giila nga si Khart Vydam Salonoy Purlas, tinun-an sa Grade 2, taga-Barangay Pugalo, Alcoy, Sugbo.
Usa ka concerned citizen nipahibawo sa Dalaguete Municipal Police Station ug base sa imbestigasyon ubos sa kamanduan sa ilang hepe nga si P/Maj. Vincent Awit Zozobrado, nasuta nga ang bata nalumos sa five feet nga gilawmon sa spring water pool, sigun sa asoy sa maguwang nga babaye.
Ang iyang manghod iya pang nakit-an nga nagkalingaw og kaligo sa tubod kuyog sa mga higala.
Apan kalit lang nagkagubot ang mga tawo nga nangaligo, nagsininggitay nga may bata nga nalumos ug dali silang nanawag og rescue team sa Brgy. Obong.
Gisuwayan sa pagtabang ang bata ug gidali sa pagdala sa Cardinal Rosales Memorial Hospital apan gideklarar nga dead-on-arrival sa attending physician nga si Dr. Celso Pacaña. / DVG