Gi-turnover sa Cebu City Hall ang walo ka brand new nga awto isip police patrol cars ngadto sa Cebu City Police Office (CCPO) lakip na ang 60 ka tag-as nga kalibre sa armas nga gipangulohan ni Cebu City Acting Mayor Raymond Alvin Garcia.
Nitambong sa turnover ang hepe sa Police Regional Office (PRO 7) Police Brig. Gen. Anthony Aberin ug P/Col. Ireneo Dalogdog, pangulo sa CCPO, Dakbayan sa Sugbo nga maoy nidawat sa mga sakyanan ug mga armas.
Gipasalamatan nilang Aberin ug Dalogdog ang Kagamhanan sa Dakbayan sa Sugbo sa walay hunong nga suporta sa kapulisan sa siyudad.
Ang maong bag-ong mga gamit dako og ikatabang sa ilang anti-criminality operation ug police visibility sa matag police station.
“Dako kaayo na siyag tabang labi na sa atong anti-criminality program labi na sa mobile patrol nga gi-donate sa atoa. Dako kaayo ning tabang sa atong pag-intensify sa atoang police visibility, kay kabalo man ta nga kining police visibility usa ni sa atong pro-active measures nga maka deter gyud ni siya sa commission of crime,” matod ni Dalogdog.
Matod ni Dalogdog nga ang 60 ka tag-as nga kalibre sa armas, upat niini sniper rifle, ihatag sa Special Weapons and Tactics sa City Mobile Force Company sanglit sila ang unang moresponde kon dunay mga alarma sa mga armado ug uban pa nga krimen nga naglambigit og armas.
Iyang gipasabot nga kinahanglan nga ang personnel sa Swat team kompleto sa gamit sama sa high end nga mga armas sama sa gidonar sa Kagamhanan sa Dakbayan sa Sugbo.
Ang mga sakyanan magamit usab dayon ning padayon nga kalihukan sa Palarong Pambansa alang sa police visibility ug pag-roving matag karon libot sa dakbayan. / AYB