Giila sa konseho sa Dakbayan sa Talisay ang paningkamot sa walo ka mga barangay nga gihatagan sa nasudnong buhatan sa Department of Interior and Local Government (DILG) og seal of good governance.
Atol sa session niadtong Martes, Agusto 5, 2025, ang walo ka mga barangay gipasidunggan sa konseho.
Ang walo ka barangay mao ang Candulawan, Lawaan-1, Lawaan-2, Lawaan-3, Biasong, Jaclupan, Tabunok ug Lagtang.
Ang pangulo sa Liga ng mga Barangay sa Talisay, Konsehal Josefina Concial nipalabang og resolusyon nga nagpasidungog sa walo ka mga barangay.
“Whereas, the Barangay Seal of Good Local Governance (BSGLG) is a program spearheaded by the Department of Interior and Local Government (DILG) to recognize barangays that uphold the principles of good governance, transparency, accountability, and effective public service,” nagkanayon ang resolusyon ni Concial.
Ang BSGLG gitumong aron pagdasig sa mga barangay nga padayong palambuon ang ilang performance sa nagkalainlaing governance areas nga naglakip sa financial administration, disaster preparedness, social protection, peace and order, ug environmental management.
Ang proseso sa pag-evaluate sa BSGLG, estrikto ug komprehensibo nga magkinahanglan sa mga barangay nga makatuman sa standard ug makapakita ug maayong performance.
Ang walo ka mga barangay nakatuman sa gipahamtang nga standard sa DILG aron makab-ot nila ang seal of good local governance. Si Mayor Gerard Anthony “Samsam” Gullas ug ang konseho nga gipangulohan ni Bise Mayor Richard “Choy” Aznar nibatig garbo sa nakab-ot nga pasidungog sa walo ka barangay. / VLM