8 ka ektaryang luna naigo sa grass fire

BUKID NASUNOG: Ang grass fire nga niigo sa dakong bukid sa lungsod sa Alicia, Lalawigan sa Bohol niadtong Lunes, Mayo 6, 2024. /
BUKID NASUNOG: Ang grass fire nga niigo sa dakong bukid sa lungsod sa Alicia, Lalawigan sa Bohol niadtong Lunes, Mayo 6, 2024. / Hulagway kuna ni Dwight PH Nocalan.

Human sa grass fire nga niigo sa duha ka bungtod sa Chocolate Hills sa lungsod sa Carmen, laing sunog niigo sa dakong bukid sa lungsod sa Alicia, Lalawigan sa Bohol niadtong Lunes, Mayo 6, 2024.

Sa interview sa Superbalita Cebu ngadto ni Fire Officer 3 Clifford Cantillas, imbestigador sa kabomberohan sa Alicia, nasuta nga ang grass fire nagsugod alas 12:30 sa hapon sa Lunes, Mayo 6, 2024, sa utlanan sa lungsod sa Ubay ug nikuyanap sa bukid sa Purok 7, Sityo Benabaje, Brgy. Cambaol, Alicia.

Matod ni Cantillas, niluntad og 12 ka oras una napawong ang grass fire human layo ug di masudlan sa fire truck. Busa, nagmotorsiklo sa pagbubo og tubig uban sa tabang sa Municipal Risk Reduction and Management Office (MDRRMO) sa Alicia nga gipangulohan ni Vice Mayor Cecil Balahay.

Ang grass fire wa makaabot sa Alicia Panoramic Park kay gitabangan og hawan sa mga sagbot ang palibot ug may fire line.

Si Cantillas niingon nga gibanabanang walo ka ektarya ang ma­ong grass fire sa mga kugon ug naapil ang mga kahoy, apan way balay nga naapektohan.

Ang maong grass fire nakontrolar alas 11:50 sa gabii sa Mayo 6, 2024, ug na-fire out alas 12:30 sa tungang gabii sa Mayo 7, 2024. Apan, ila kining giatngan aron dili mobalik sa pagsiga ang kayo hinungdan nga alas 5:00 na sa sayong buntag sila nibalik sa ilang fire station sa Martes, Mayo 7, 2024.

Matod ni Cantillas nga duda nila may gadaub sa bukid sa habig sa Ubay ug gumikan kay naghangin padung sa Alicia ug didto na nakadako ang maong grass fire. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph