Walo ka mga suspek nga sakop sa duha ka gun-for-hire group nga naglihok sa Dakbayan sa Sugbo ang nadakpan sa gilusad nga anti-criminality operation sa Cebu City Police Office (CPPO) gikan sa Enero 17, 2025 hangtod sa Marso 1, 2025.
Ang walo ka mga dinakpan maoy gitumbok ni Police Brigadier General Redrico Maranan, hepe sa Police Regional Office (PRO) 7 nga maoy responsable sa sunod-sunod nga shooting incident sa dakbayan ug Lalawigan sa Sugbo.
Matod ni Maranan nga atol sa maong operation ilang nadakpan ang mga gunman, lookouts ug ang contacts niini, ug ilang nasakmit ang walo ka mga armas nga ilang gigamit sa krimen lakip na ang mga pinakete sa gituohang shabu nga motimbang sa 166 gramos.
Ang duha ka gun-for-hire group giila nga OƱeza ug Ylaya.
Nagtuo si Maranan nga mahunong na ang sunodsunod nga pagpamusil sa Dakbayan sa Sugbo.
Pulos na gipasakaan og kaso ang mga suspek ug sa walo nga nadakpan upat niini ang nabalhog na sa Bureau of Jail Management and Penology (BJMP) samtang usa ang gikan sa Dakbayan sa Toledo.
Gitakdang ipaubos sa ballistic examination ug cross matching ang mga nakuhang armas sa mga suspek aron itandi sa mga kaso sa pagpamusil sa Metro Cebu.
Kasagaran sa grupo mogamit og mga menor de edad nga magsilbing lookout ug contact apan dunay higayon nga sila ang suguon sa pagpamusil. / AYB