Walo ka tawo ang nasikop sa pagronda sa kapulisan sa tigbakayan, alas 12:50 sa hapon, Dominggo, Di- syembre 3, 2023, sa Purok Miape, Brgy. Calero, lungsod sa Liloan.
Naposasan sa mga polis sa Liloan mao sila si Roy Labadan Malazarte, 24, ulitawo taga Purok Gumamela, Brgy. Jubay; Christian Rey Sasing, 26, taga Purok Agbati, Brgy. Calero; Gerald Ian Chavez Alcover, 42, taga Purok Miape, Brgy. Calero; Arjay Maglasang Garbo, 31, taga Purok Camonggay, Brgy. Calero; Mark Steven Allado Alinsug, 20, taga Purok Agbati, Brgy. Calero; Danny Mainopas Bulao, 50, taga Purok Miape, Brgy. Calero; Ramon Julianes Pasco, 65, taga Purok Sikwa, Brgy. Calero; ug Fedelino Maglasang Ikot, 59, taga Purok Opo, Brgy. Calero.
Si Major Eric Gingoyon, hepe sa Liloan Police Station nga nahinabi sa Superbalita Cebu, nagkanayon nga nakadawat silag impormasyon nga kusog kaayo ang tigbakay sa maong lugar. Wala maglangay, gisuhid sa ilang mga personnel ang maong dapit ug naabtan nila ang daghang sugarol nagmasyada.
Ug dihang nakit-an nga dunay polis, nagkatibuag sa panagan ug ang walo mao ang nasignit sa kapulisan.
Nakuha sa kapulisan ang duha ka bihag nga manok, duha ka buwang, ug P750 nga pusta.
Si Gingoyon nagkanayon nga kasong kalapasan sa Presidential Decree 1602 kun illegal gambling o tigbakay ang ilang ipasaka batok sa mga dinakpan.