Walo ka drug personalities ang nangadakpan sa managlahi nga anti-drug operation sa Philippine Drug Enforcement Agency (PDEA) 7 sa Dakbayan sa Sugbo ug Bohol nga niresulta sa pagkasakmit sa kapin tunga sa milyun ka pesos nga balor sa ilegal nga drugas sa Lunes ug Martes, Marso 10-11, 2025.
Kanhi traffic enforcer sa Dakbayan sa Sugbo ang nasikop sa gilusad nga buy-bust sa PDEA 7 Regional Special Enforcement Team uban sa Philippine National Police (PNP) Drug Enforcement Group/Special Operation Unit (PDEG/SOU) 7 ug Cebu City Police Office (CCPO) sa Sitio Mahayahay 1, Barangay Calamba, Dakbayan Sugbo alas 6:43 sa buntag, Martes, Marso 11, 2025.
Ang suspek giila nga si Adamson Daday Ramirez, 41, nga nagpuyo ra usab sa maong lugar.
Nakuha gikan kaniya ang 9 ka pakete sa gituohang shabu nga motimbang sa 50 gramos nga dunay estimated average market value nga P340,000 ug ang buy-bust money.
Matod ni Leia Alcantara information officer sa PDEA 7 nga duha ka buwan nga gipaubos sa case buildup ang suspek human sila makadawat og impormasyon gikan sa usa ka kasaligang tinubdan. Giingong makabaligya si Ramirez og 50 ngadto sa 100 gramos nga shabu matag semana.
Samtang usa ka drug den nga nahimutang sa Purok 6, Barangay Cogon sa Dakbayan sa Tagbilaran, Probinsiya sa Bohol ang gibungkag sa PDEA-Bohol Provincial Office, uban sa Tagbilaran City Police Station ug Maritime Police alas 4:01 sa hapon, Lunes, Marso 10, 2025 nga niresulta sa pagkasikop sa tulo ka tawo, usa niini senior citizen.
Ang mga nasikop giila ni PDEA 7 Director Alex Tablate nga si Alyas Nelson nga maoy target sa operation ug drug den maintainer, 72, panday nga molupyo sa maong lugar.
Lakip sa nadakpan ang duha ka tawo nga naabtan nga naghingos og shabu sa sulod sa drug den nga silang alyas Ramil, 39, ug alyas Arman, 29, pulos tricycle driver nga taga Barangay Cantomimbo, Lungsod sa Balilihan.
Nakuha sa mga operatiba ang 7 ka pakete sa gituohang shabu nga motimbang sa 10 gramos nga mobalor og P68,000, buy-bust money, duha ka cellphone ug mga drug paraphernalia.
Matod ni Alcantara nga usa ka semana nga gipaubos sa case buildup si Nelson human nila madawat ang impormasyon gikan sa kasaligang tinubdan.
Makabaligya kini og 25 gramos matag semana gikan sa iyang supplier.
Pagka alas 9:07 sa buntag laing drug den nga nahimutang sa Sityo Lawis-Alaska, Barangay Mambaling, Siyudad sa Sugbo ang gironda sa PDEA 7 nga niresulta sa pagkasikop sa upat ka mga drug personality.
Ang mga nasikop giila nga silang alyas Edwin, 57, nga maoy nagpadagan sa drug den nga nagpuyo sa maong lugar.
Lakip sa nadakpan mao silang alyas Felix, 44, panday, taga Barangay Pamutan, Alyas Ham, 32, dishwasher, taga Barangay Mambaling ug Alyas Ronald, 42, land processor, taga Barangay Talamban, Dakbayan sa Sugbo.
Nakuha sa PDEA 7 ang 10 ka pakete sa gituohang shabu nga motimbang sa 15 gramos nga dunay balor sa P102,000, buy-bust money ug mga drug paraphernalia. Ang mga nakuhang ebidensya giduso sa PDEA 7 Regional Office Laboratory alang sa chemical analysis ug proper disposition.
Duha ka semana nga gi-monitor si Edwin nga makabaligya og 15-20 gramos matag semana.
Kalapasan sa Section 5 ug 11, Article II, Republic Act 9165 ang giandam nga kaso sa mga suspek nga kasamtangan nga naa sa kustodiya sa PDEA 7 facility. / AYB