80 ka balay sa Talisay naugdaw

80 ka balay sa Talisay naugdaw

Nikabat sa 80 ka mga balay ang nangaugdaw sa sunog nga niigo sa Purok Kamungay, Sitio Libra, Barangay Poblacion, dakbayan sa Talisay pasado alas 8 sa buntag sa Miyerkules, Enero 24, 2024.

Matod ni Fire Officer (FO1) Jerome Dolauta, fire investigator sa Talisay City Fire Office (TCFO), ilang nadawat ang alarma sa sunog alas 8:10 sa buntag ug ilang gisaka sa 1st alarm pagka alas 8:12 sa buntag.

Tungod sa kakusog sa kayo nga nikaon sa kabalayan nga ginama sa light materials, gisaka pa sa 2nd ug 3rd alarm sa pagka alas 8:18 ug alas 8:23 sa buntag.

Kini maoy hinungdan nga ang mga bombero sa Metro Ce­bu sama sa dakbayan sa Sugbo, Mandaue ug Lapu-La­pu ningresponde na.

Gideklarar nila nga under control sa pagka alas 9:12 sa buntag ug nianang alas 9:20 sa buntag hingpit nang napawong ang kayo.

Gibana-ana sa kabomberuhan nga moabot sa P3 milyunes ang danyos sa sunog ug nakaapekto og di mominus 120 ka mga pamilya.

SINUGDANAN

Unang migawas nga impormasyon nga didto sa panimalay ni Elmer Labrador nagsugod ang kayo apan hugot niya kining gihimakak.

Matod ni Labrador nga imposible kaayo nga sa ilaha magsugod ang kayo tungod kay bag-o pa siya nakalakaw.

Iyang gisiguro nga naka off ang tanang appliances ug wala usay nagluto.

“Ang ilang giingon nga niulbo kuno nga wala man koy giluto diha nga koan nya mao pasad ang paglakaw nako. Ang akong asawa naa sad gilakaw,” matod ni Labrador.

Si Rosalito Quijano, usa sa mga biktima sa sunog, nibutyag nga didto nagsugod ang kayo sa balay sa lain nilang silingan (gipugngan ang ngalan).

Matod niya nga ang unang nakabantay nga niaso na ang balay sa ilang silingan mao ang iyang asawa hinungdan nga iyang gipahibawo ang tagbalay nga miulbo na ang kayo.

Gibutyag usab ni Quijano nga maka lima na kini ka higayon nga nasunog ang balay sa ilang silingan ug ning katapusan daghan na gyud ang napagan.

Sa miaging mga insidente, ang mga anak sa ilang silingan giingong nagduwa og lighter ug pusporo ug magdaub sa sulod sa ilang balay.

“Paggawas nako, Sir, gikan ko sa amoa kay natulog ko, nakita nako ang kayo nga gikan sa ilahang _____ nga nagsugod sa second floor. Ako nana gibadlong kay ikalima naman na nasunog ang ilang balay. Karon ang ikalima nga nadayon na gyud nga daghan na naamong,” matod ni Quijano.

NASAAG?

Nasagmuyo si Quijano nga duol ra unta kaayo ang bombero nga malabay ra gani og bato apan wala dayon makaresponde kay nasaag kay didto miagi sa luyo nga matod niya, mahimo unta nga moagi sa Larawan beach.

Si FO1 Dolauta nibutyag nga mohimo pa sila’g imbestigasyon kon asa sa duha ka mga balay nagsugod ang kayo.

Ilang ipatawag ang duha ka mga tagbalay.

Si Attorney Alvin Torsion, city fire marshall sa Talisay City Fire Office, nagkanayon nga wala silay nakitang problema sa agianan kay maka-access ra sila apan ang kakusog sa hangin ang ilang nakita nga problema.

“Pwerte gyud kusoga sa hangin, nag bali-bali,” matod ni Torsion.

Kasamtangan nga gipahimu­tang sa gymnasium sa dakbayan ang mga apektadong pamilya ug gihatagan na usab og hinabang sama sa pagkaon sa City Social Welfare and Services.

HINABANG

Ang barangay nanghatag na og mga packed lunch alang sa mga pamilyang naapektuhan sa sunog nga kasamtangang nag-estar sa makeshift tents sa Poblacion gym.

Atol ning pagsuwat, ang City Social Welfare Development Office (CSWDO) team nagpadayon pa sa pag-assess ug pag-validate sa lugar ug sa ilang tagsa-tagsa ka pamilya.

Nagtukod usab og medical station uban sa mga doktor ug nars aron mahatagan og tabang medikal ang mga nasunogan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph