Duha ka mga buwan sa dili pa ang kasaulogan sa Sinulog Festival, 80 porsiyento na nga na-book ang mga hotel ug ubang kapuy-an sa dakbayan sa Sugbo, tungod kay gipaabot sa siyudad nga minilyon ka mga bisita ang mosalmot sa kasaulogan sa sayong bahin sa sunod tuig.
Si City Councilor Jocelyn “Joy” Pesquera nitug-an sa SunStar Cebu nga ning buwan pa lang sa Nobiyembre, ang mga hotel ug pension houses sa dakbayan sa Sugbo nakadawat na og daghang reservation gikan sa mga turista nga gustong mosaksi sa festival, sa Enero 21, 2024.
Siya nidugang nga ang Fili Hotel sa NUSTAR, usa ka iladong hotel nga nahimutang sa South Road Properties (SRP), diin ipahigayon pag-usab ang Sinulog Festival, ang nakadawat sa daghang bookings.
Si Pesquera, kinsa maoy chairperson sa committee on tourism sa Konseho, niingon nga sa gidaghanon sa hotel bookings karon, iyang gipaabot nga dos milyunes ka bisita ang mosaksi sa Sinulog Festival sa Enero.
Gipaabot niya nga fully booked na ang mga accommodation o 100 porsiyento nga ma-book usa ka semana sa dili pa ang Sinulog week, gikan sa Enero 7 ngadto sa 12.
Matod sa konsehal, adunay 70 ka mga hotel ug pension houses sa dakbayan sa Sugbo.
SISTER CITIES
Dugang pa ni Pesquera nga gawas sa mga lokal nga turista, iyang gipaabot nga modagsa ang international arrivals ilabina gikan sa mga “sister cities” sa dakbayan sa Sugbo nga mosaksi sa Sinulog Festival.
Ang relasyon sa sister city nagpasabot sa usa ka komprehensibo, malungtaron nga pakigtambayayong tali sa duha ka mga komunidad sa lainlaing mga nasod.
Sumala sa report sa Agusto 2022 gikan sa Cebu City Public Information Office, ang Siyudad adunay sister city agreements uban sa Xiamen sa China; Kaohsiung sa Taiwan; Yokohama sa Japan; Haarlemmermeer sa Olanda; Yeosu sa Korea; Salinas, California; Chula Vista, California; Seattle, Washington; Guadalajara, Mexico; Kitchener, Ontario; Honolulu, Hawaii; Parramatta, Australia; Sabrosa, Portugal; Izmir, Turkey; Barcelona, Espanya; ug Thessaloniki, Greece.
Apan, si Cebu City Councilor James Anthony Cuenco niingon sa interbyu niadtong Septiyembre 11 nga sa dul-an sa 20 ka sister cities sa tibuok kalibutan, pipila lang ang nagpabiling aktibo, ug kini mao ang mga siyudad sa Xiamen, Kaohsiung, Yokohama, Haarlemmermeer, Yeosu, ug Seattle.
Si Cuenco maoy chairperson sa Sister Cities Commission sa Cebu City Council.
Niadtong Septiyembre, ang siyudad sa Vladivostok sa Russia bag-o lang nipirma og sister city agreement uban sa siyudad human sa pagbisita ni Mayor Michael “Mike” Rama didto aron motambong sa tulo ka adlaw nga economic forum nga naglangkob sa mga diskusyon sa agro-biotechnology, Russia-Association of Southeast Asian Nations Business dialogue, ug ang Eastern Economic Forum.
GISUPAK
Matod usab ni Pesquera nga supak siya sa sugyot nga ibalhin ang pagsugod sa programa sa Sinulog Festival gikan sa buntag ngadto sa hapon kay basin magduha-duha ang publiko sa pagsalmot sa kapistahan tungod sa bag-ong panahon.
Siya niingon nga nabalaka siya nga ang pagbag-o mahimong mosangpot sa pagminus sa mga turista, busa, gisugyot nga ipadayon ang kasamtangan nga iskedyul aron ang publiko adunay tibuok adlaw sa pagsaulog, nga nag-ingon nga sila naanad na sa Sinulog sugod sa buntag.
Si Konsehal Phillip Zafra, pangulo sa peace and order committee, niingon nga niadtong Nobiyembre 15, ilang gituki nga kinahanglang i-adjust ang eskedyul sa Sinulog sa SRP alang sa mas maayo’ng kasinatian sa mga tumatan-aw.
Niadtong Enero, ang Sinulog festival gisugdan pinaagi sa misa sa alas 8 sa buntag sa SRP, gisundan sa grand parade sa alas 9 sa buntag, nga natapos mga alas 8 sa gabii.