Gihimo ang laing hugna sa pagsunog sa mga shabu ug ubang matang sa ilegal nga drugas nga nasakmit sa mga sakop sa Philippine Drug Enforcement Agency (PDEA) 7 ug sa Police Regional Office 7 nga dunay pagtugot sa korte.
Ang pagguba sa maong mga ebidensya gisunog gamit ang thermal facility sa Cosmopolitan Funeral Parlor sa dalan Junquera sa Siyudad sa Sugbo alas 9 sa buntag, Huwebes, Hunyo 5, 2025.
Ang mga gipangsunog naglangkob sa 82.34 kilos nga shabu, 3.4 kilos sa marijuana, 15.7 ml sa nalbuphine hydrochloride ug 16 ml sa ephedrine nga mobalor ang tanan sa P560,402,548.28.
Kini na ang labing dako nga nasunog sa PDEA 7 sukad niadtong 2017.
Matod ni PDEA 7 Director Alex Tablate nga ang gidaghanon sa ilegal nga drugas nga ilang giguba karon wa magpasabot nga nagkadaghan ang suplay sa ilegal nga drugas nga nangabot sa Sugbo tungod kay nagpakita lang kini nga ang PNP ug ang PDEA wala mohunong sa ilang pagpanakop.
Usa usab sa indikasyon nganong daghan sila karon og nasunog tungod sa maayong koordinasyon sa ilang ahensiya ug sa kapulisan.
Gidayeg sab niya ang mga korte sa tibuok Central Visayas gumikan sa dali nga pagdesisyon paghatag og pagtugot aron masunog sama niadtong kapin sa 25 kilos sa shabu nga nasakmit sa pantalan ang giapil sab. / AYB