Moabot sa 86 ka mga langyaw ang nadakpan sa mga awtoridad atol sa usa ka dakong operasyon sa pagpatuman sa balaod nga nagtarget sa gidudahang online scam hub nga naglihok gikan sa condominium sa Sen. Gil Puyat Avenue sa Barangay Pio del Pilar, Makati City niadtong Abril 10, 2025.
Ang maong operasyon gihimo pinasikad sa mission order nga giluwatan ni Bureau of Immigration (BI) Commissioner Joel Anthony Viado, nunot sa intelligence reports mahitungod sa usa ka scam syndicate nga giingong nagpugos sa mga langyaw sa paghimo og online fraud.
Lakip sa gidakop mao ang mga indibidwal gikan sa China, Malaysia, ug Vietnam.
Ang mga awtoridad nag-ingon nga ang mga suspek giingong nalambigit sa pag-maniobra sa nagkalain-laing online scam, lakip na ang e-commerce ug romance fraud, nga nagtarget sa mga biktima gikan sa lokal ug gawas sa nasud.
Ang imbestigasyon naggumikan sa usa ka mensahe pinaagi sa WhatsApp sa usa sa mga langyaw nga nag-ingon nga wala siya tugoti nga mobiya sa trabahuan.
Sa usa ka follow-up case build-up sa Criminal Investigation and Detection Group (CIDG), nasayran nga usa ka pinahimutang nga operasyon nga naghaylo sa mga biktima sa pagpadala og kwarta pinaagi sa peke nga online order o dating platform, nga walay mga produkto nga madawat isip balos.
Atol sa raid, naabtan sa mga ahente ang mga suspek nga nagtrabaho sa daghang mga computer station sulod sa condo unit.
Wala makapakita ug dokumento ang mga dinakpan nga nagpamatuod sa ilang legal nga pinuy-anan o kahimtang sa pagpanarbaho sa Pilipinas.
Ang Fugitive Search Unit sa BI, inubanan sa Philippine National Police - CIDG's National Capital Region Field Unit, ang nangulo sa raid.
Matod ni Viado nga mahinungdanon kaayo ang pagpanalipod sa legal ug digital nga integridad sa nasud.
“The presence of foreign nationals working without proper documentation and engaging in criminal activity is a serious breach of our laws and national security,” matod niya.
Ang mga dinakpan nga mga langyaw gipaubos sa documentation ug ibutang sa BI Warden’s Facility sa Taguig City samtang naghulat nga i-deport. / JGS / SunStar Philippines
