89 anyos ‘naligid’ sa bakilid, patay

89 anyos ‘naligid’ sa bakilid, patay
SunStar Local News GPX

Patay na’ng nadiskubrehan ang 89 anyos nga lola sa Barangay Mangyang nga usa sa mga bukirang da­pit sa lungsod sa Si­bonga, alas 5:30 sa hapon sa Miyerkules, Marso 13, 2024.

Ang nakaplagang patay na sa iyang pamilya giila nga si Anastasia Zamora Ordeñeza, biyuda, molupyo sa nahisgutang dapit.

Ang maong hitabo ilang gitaho sa kapulisan.

Nitubag dayon sa maong alarma ang mga sakop sa Municipal Disaster Risk Reduction ang Management Office (MDRRMO) sa Sibonga.

Lakip sa niuban sa pagsusi sa dapit mao ang mga polis nga sila si Police Master Sgt. Gerardo Abad, Patrolman Ricablanca, ug Patrolman Romano, ubos sa kamandoan sa ilang hepe nga si Police Capt. Fort Antony Valdez.

Sa ilang imbestigasyon, nasayran nga ang maong lola nagpuyo sa iyang balay nga kuyog sa usa niya ka apo nga babaye.

Matod pa, na-missing si Ordeñeza sukad sa alas 11 sa buntag sa naasoy nga adlaw ug sa ilang pagpangita, na­kit-an siya nga diha na sa ubos sa balikid sa bukid sa pagka alas 5 sa hapon sa maong adlaw ug wala nay kinabuhi.

Nagtuo ang mga kabanay ug kapulisan nga siya naligid sa bakilid nga buntod tungod usab sa iyang katiguwangon ug luya na.

Kay wala kini nabantayi dayon, dugang sa kapulisan, posible nga kini ang hinungdan sa iyang kamata­yon.

Gisalikway sa kapulisan nga dunay foul play sa kamatayon sa lola. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph