Mokabat sa 89 ka mga kaso sa rabies nga niresulta sa kamatayon natala sa Department of Health (DOH) sa unang 11 ka mga semana sa 2024.
Sa hamubo nga pamahayag, ang DOH nagkanayon nga adunay kinatibuk-ang 89 ka mga kaso sa rabies ang natala gikan sa Enero 1 hangtod sa Marso 16.
“All rabies cases are fatalities, resulting in a 100 percent case fatality rate,” matod sa DOH.
Ang DOH nagkanayon nga ang 89 ka mga kaso ug nangamatay mas ubos og dos porsiyento kon itandi sa naasoy nga ihap sa samang panahon sa miaging tuig nga 91.
Gipakita sa datos, ang Soccsksargen adunay pinakataas nga kaso nga adunay 12 ka kaso, gisundan sa Calabarzon ug Bicol Region nga adunay 11 ka kaso matag usa.
Ang DOH niingon nga dakong mayoriya, 82 (92 porsiyento) sa mga kaso, sa rabies tungod sa pinaakan sa iro, samtang lima (5 porsiyento) sa mga kaso tungod sa pinaakan sa iring.
Ang nahabilin nga duha ka mga kaso gumikan sa pinaakan sa ubang mga hayop.
Sa mga mananap, ang DOH niingon nga 40 (45 porsyento) sa mga kaso ang nagagumikan sa wala pa nabakunahan nga mga hayop, usa (1 porsyento) nga kaso gikan sa hingpit nga nabakunahan nga hayop, samtang 48 (54 porsyento) sa mga kaso gikan sa mga hayop nga wala masayri ang kahimtang sa pagbakuna.
Ang rabies usa ka sakit nga mapasa pinaagi sa pinaakan sa mananap o samad gikan sa laway sa mananap nga contaminated sa virus.