Mokabat sa 8,000 ka mga sakyanan ang nalambigit sa mga aksidente sa kadalanan sa Davao City gikan sa Enero hangtod Oktubre 2023, matod sa opisyal sa Davao City Police Office-Traffic Enforcement Unit (DCPO-TEU).
Si PMaj. Dexter Domingo, hepe sa DCPO-TEU, niingon atol sa iSpeak media forum niadtong Huwebes, Nobiyembre 30, sa City Mayor’s Office, nga adunay mokabat sa 8,473 ka kaso sa mga sakyanan nga nalambigit sa aksidente sa Davao City gikan sa Enero hangtod Oktubre 2023.
Kon itandi niadtong 2022 diin 7,187 ka mga sakyanan ang nalambigit, nisaka og 18 porsiyento karong tuiga.
Ang pagsaka sa ihap sa mga insidente naobserbahan usab gikan sa 4,248 sa 2022 ngadto sa 4,776 karong tuiga, o pagtaas sa 11 porsiyento.