9 anyos ‘gimolestiya’ sa higala sa iyang amahan

Cebu City map.
Cebu City map.

Nanghuboy ang nawong sa suspek sa pagmolestya sa usa ka bata human gitabangan og kulata sa mga estambay.

Ang suspek higala ra sab sa amahan sa bata. Mga ngan gipugngan ning mantalaan aron mapanalipdan ang i­­dentity sa bata.

Nadakpan niadtong Lunes sa gabii, Marso 18, 2024 si An­dot, 42, adunay kapuyo, taga-Sityo Tayud, Barangay Basak Pardo, Cebu City.

Matod ni barangay konsehal Tayoks Limbaga sa Basak-Pardo nga si Andot higala sa amahan sa 9 anyos nga babaye nga giingong iyang gimolestiya.

Asoy sa barangay opisyal sa Superbalita Cebu nga sa higayon nga mahubog ang suspek, manghinolhinol kini sa pribadong bahin sa lawas sa menor de edad.

Nabulgar ang binuhatan sa suspek sa dihang ang biktima nisugilon ngadto sa iyang kaduwa ingon man ngadto sa iyang inahan.

Ang inahan sa biktima nidangop sa barangay hall aron pag-report sa gihimo ni Andot ngadto sa menor de edad, hinungdan nga gipangita ang suspek.

Nasikop si Andot sulod sa balay sa iyang silingan diin siya nitago ug sa wa pa ang pagdakop, siya gikulata sa mga istambay sa lugar.

Si Andot gi-turnover ngadto sa Inayawan Police Station sa Cebu City Police Office (CCPO). / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph