Naengkuwentro sulod sa upat ka mga higayon sa mga sakop sa 62nd Infantry “Unifier” Battalion ubos sa 302nd Infantry Brigade ang gibanabanang siyam ka mga sakop sa New Peoples Army (NPA) nga nahibiling sakop sa NPA Guerilla Front, Central Negros 1 (CN1) sa Komiteng Rehiyon-Negros, Cebu, Bohol, Siquijor (KR-NCBS) sa Barangay Humay-Humay, Dakbayan sa Guihulngan, Negros Oriental.
Unang insidente sa engkwentro nahitabo alas 6:07 sa buntag sa Huwebes, Mayo 1, 2025, atol sa pagsaulog sa Labor Day.
Niresulta kini sa pagkasakmit sa usa ka M4 Assault Rifle ug nagkalainlaing war materials ug personal nga mga gamit.
Nilusad dayon og hot pursuit ang mga sundalo ug niresulta na usab sa laing engkwentro alas 6:51 sa buntag sa samang adlaw.
Sa dihang ang habig sa gobiyerno nipakusog pa sa ilang operation, nitumaw na sab ang sinukliay sa mga bala alas 12:10 sa udto nga niresulta sa pagkaigo sa usa sa mga sakop sa NPA ug pagkasakmit sa usa ka M16 Rifle ug nagkadaiyang war material ug personal nga gamit.
Ang katapusang engkuwentro nahitabo ala 1:45 sa hapon.
Sa mga gikaengkuwentro sa mga sundalo, usa ang nasikop samtang nakaikyas ang laing walo. Ang maisog nga mga sundalo sa gobiyerno nagpadayon sa pagpakita sa ilang wala’y hunong nga panaad sa pagsumpo sa local communist armed conflict sa tibuok Visayas region.
Ang malampuson nga sunodsunod nga mga engkuwentro nagpakita sa dedikasyon ug sakripisyo sa mga sundalo alang sa pagkab-ot sa malungtarong kalinaw ug siguridad sa katawhan.
Tungod niini, gidayeg sa Visayas Command ang ilang mga sundalo nga nakigbatok sa mga komunistang grupo.
Matod ni Lieutenant Colonel Israel Galorio information officer sa Visayas Command nga magpabiling determinado ang gobiyerno sa ilang mandato pagbantay sa kalinaw ug siguridad sa rehiyon.
Samtang nangandam sila sa nagsingabot nga National ug Local Election, ilang gipasalig ang ilang wala’y paglugak nga commitment sa paghatag og seguridad sa katawhan nga luwas ug gawasnon nga makaboto sa ilang pilion nga mga kandidato nga wala’y manghulga. (AYB)