Niabot na og 92 ang ihap sa naugkat nga patay sa dakong pagdahili sa yuta nga niigo sa mining village sa Masara, lungsod sa Maco, Davao de Oro, sumala sa Provincial Government sa Huwebes sa gabii, Pebrero 15, 2024.
Gidugang niini nga 36 ka mga tawo ang nagpabilin nga missing, samtang labing minos 32 ang nangaangol.
Lakip sa nakuha gikan sa landslide site mao ang mga parte sa lawas, matod sa Provincial Government alas 7 sa gabii sa Huwebes nga report sa Maco Municipal Disaster Risk Reduction and Management Office (MMSRRMO).
Ang pipila sa mga lawas wala pa mailhi tungod kay ang pipila sa mga nangamatay gipailalom pa sa validation.
“As of 7 p.m. karong adlawa (February 15, 2024), aduna na kitay natala nga 92 ka na recover nga patayng lawas diin lakip niini sa nakuha parte na lang sa lawas,” sumala sa FB post sa Provincial Government.
Gibalhin sa mga rescuer niadtong Pebrero 13 ang search and rescue operations ngadto sa pagpangita ug pag-ugkat, kay kapin na sa usa ka semana sukad nahitabo ang pagdahili sa yuta.
Ang pagdahili sa yuta niigo sa Maco niadtong Pebrero 5, nga nilubong sa daghang mga balay, terminal sa usa ka bus company, ug usa ka barangay hall.
Ang kalamidad nahitabo human sa kusog nga pag-ulan tungod sa Northeast Monsoon (Amihan) ug ang trough sa usa ka low pressure area sukad sa Enero 28. / LMY