Tulo ka mga estabilisemento nga nasulod sa nailang Chocolate Hills sa Lalawigan sa Bohol, nga gideklarar sa UNESCO nga Global Geopark ug usa ka protected area, gisusi ni Benhur Abalos, kalihim sa Department of the Interior and Local Govenment (DILG) sa Huwebes, Marso 21, 2024.
Kauban ni Abalos ang lokal nga mga opisyal ug mga opisyal sa hingtungdang mga ahensiya sa kagamhanan bahin sa pagkatukod sa maong mga resort sulod sa usa ka protected area.
Unang gisusi ang kontrobersiyal nga nag-viral sa social media nga Captain’s Peak Garden and Resort sa lungsod sa Sagbayan.
Lakip sa gisusi mao ang Sagbayan Peak sa samang lungsod nga taudtaod nang nahimo’ng suroyanan. Laing gisusi mao ang usa ka estabilisemento sa lungsod sa Carmen nga sentro sa Chocolale Hills.
Niadtong Lunes, Marso 18, 2024, si Abalos nagtukod og special investigation team sa pag-ugkat sa posible nga environmental ug administrative violations tungod sa katukuran sa maong mga resort. / EHP