NAUKAY ang mga sakop sa Abellana Police Station 2 sa Cebu City Police Office (CCPO) sa report nga usa ka Korean national ang giingong gi-kidnap human nga nabuwag sa kaubang Koreans nga nag-inom sa usa ka imnanan sa Mango Avenue, Cebu City niadtong gabii sa Martes, Hunyo 3, 2025.
Ang mga kaubang Koreans nakadawat og chat sa paglukat sa ilang higala sa kantidad nga P40,000 gamit ang usa ka dummy account.
Nisamot ang kabalaka sa dihang nanginlabot na ang Korean Embassy nga nagmando sa kapulisan sa pagpangita sa ilang national nga gituohan gi-kidnap.
Sa dihang nasubay pinaagi sa pag-trace sa mobile phone sa maong langyaw sa gikataho nga nawala nga langyaw nga anaa sa usa ka convenience store sa dalan V. Rama.
Dali nga niresponde ang mga polis sa dapit uban sa duha ka Koreano nga higala ug ila ning naabtan sa maong tindahan nga malipayon ug tagay og ilimnong makahubog uban sa usa ka sakop sa Lesbian, Gay, Bisexual, Transgender, Queer (LGBTQ).
Sa imbestigasyon sa Abellana Police Station, nasuta nga nianang sayo sa gabii sa Martes, Hunyo 3, 2025, adunay nakaila nga babaye ang tulo ka managhigala ug gidala nila kini sa usa ka imnanan sa Mango.
Sa dihang nakahurot na sila og duha ka long neck nga imnunon nananghid ang duha nga mobalik na sa hotel ug nagpabilin ang usa nga ginganlan sa alyas nga Kim, 25-anyos uban sa nakaila niya nga babaye.
Natingala ang mga kauban nga nakaadlawon na lang wala pa mabalik sa hotel si Kim hangtod nga nakadawat sila og chat nga daw nag-demand og P40,000 bugti sa kagawasan sa naasoy nga Koreano, hinungdan nga nidangop sila sa kapulisan aron magpatabang sa pagpangita.
Ang report sa duha ngadto sa police station nga gidagit ang ilang kaubang Koreano nga nakapaukay sa mga polis lakip na sa Korean Embassy.
Dali nga gipangsubay sa mga polis ang dapit diin sila nag-inom lakip na ang posibling giagian niini apan pakyas sila sa pagkuha sa kasayuran.
Sa dihang nasuta nga wala diay kini kidnapa nahuwasan ang mga polis lakip na ang Embassy sa Korea.
Gibutyag sa gipangita nga Koreano nga tungod sa kahubog nagtuo siya nga usa ka babaye ang iyang nadala sa motel.
Nakugang na lang siya nga sa paghubo nilang duha aduna diay kargada sama niya.
Apan kay naa na man sila sa sulod iya na lang kini nga gipaundayonan ug pagkahuman sa ilang panagtagay sa lawasnong kalipay gibayran niya kini sa kantidad nga ilang nasabotan.
Nagpasalamat ug nangayo og pasaylo ang Korean Embassy ngadto sa kapulisan sa nahitabong kahasol nga gihimo sa batan-on. /AYB