NAGTUO nga lain na sab nga mabdos nga kliyente ang mo-avail sa serbisyo sa abortionist bugti sa P40,000 nga bayad, apan operasyon diay sa polis nga niresulta sa pagpasikop sa tulo ka tawo.
Ang Regional Special Project Unit-7 ang nirumbo sa motel nga nahimutang sa Barangay Mabolo, Cebu City sa alas 12:00 sa udto, Huwebes, Hunyo 19, 2025, diin didto unta himuon ang ilang ilegal nga operasyon.
Ang mga dinakpan giila nga si Amparo, 75, unlicensed abortionist; drayber nga si Jessie, pulos taga Dakbayan sa Talisay; Romar, 46, middleman, taga Dakbayan sa Danao.
Niabang og kuwarto sa maong motel ang mga suspek base sa ilang nasabutan sa ilang kliyente nga ilang naila pinaagi sa social media nga nagpatuo nga magpakuha sa iyang gisabak ug niuyon sa gipangayo nga P40,000 nga bayad.
Ang maong kita tungaon ni Amparo ug Romar.
Apan polis man diay ang niabot ug gipusasan ang mga suspek ug ang pagkasakmit sa mga surgical instrument, pills o tambal.
Si Amparo kanhi assistant sa doktor, nitug-an ngadto sa mga tigbalita nga napugos siya sa maong binuhatan kay daghan ang mohangyo kaniya.
“Ako dili gyud unta ko gusto ani, pero manghangyo man sila kay tungod kuno sa kalisod, dili sila gustong manganak kay ilang bata gamay pa, ang uban naay sakit sa kasing-kasing. Mao na nga mapugos ko, pero dili ko magpataka sad,” matod ni Amparo nga nahinabi sa mga tigbalita.
Nasayran nga aduna nay 15 ka mga kliyente nga nagpa-abort ni Amparo sukad nagsugod siya sa maong trabaho kapin na sa usa ka tuig.
KONEKTADO BA?
Samtang si Police Regional Office–Central Visayas Director Brigadier General Redrico Atienza Maranan niingon nga ang pagkasikop sa mga suspek usa ka offshoot nga operasyon sa nahitabo niadtong Hunyo 13, 2025, nga napalgan ang tulo ka puya sa Lungsod sa Liloan.
Apan giklaro ni Maranan nga palawman pa nila ang imbestigasyon kon konektado ba kini sa maong insidente.
“Gusto natin tingnan sa ganung anggulo na malaki ang possibility na sila din yun. Gusto natin tingnan kasi marami ba ang gumagawa nito dito sa Region 7? Maaring sila lang ang grupo, so we are still investigating,” asoy ni Maranan.
Tungod sa maong panghitabo, nipahigayon sila og mas lapad nga operasyon sa Region 7 aron pangitaon ug gukdon ang mga tawo nga nalambigit sa ilegal nga aborsyon.
Giklaro sab ni Maranan nga andam silang motabang sa mga nahimong biktima sa mga suspek aron mapasakaan og reklamo tungod kay ilegal ang ilang gibuhat.
Ang mga suspek gitanggong sa CCPO ug gipaabot nga pasakaan sila og tukmang kaso. / JDG