GIABLIHAN nila ni Cebu Governor Pamela Baricuatro ug Cebu City Mayor Nestor Archival ang IT Park Road sa V. Padriga Street, nga nahimutang atbang sa Crossroads sa Banilad padulong sa Gov. Cuenco Avenue human sa lima ka tuig nga kini gisirhan. Kini nga bag-ong dalan direkta nga nagtubag sa dugay nang problema sa grabeng trapiko sa Banilad-Talamban area, ilabi na kon peak hours.
Gilauman nga ang IT Park Road sa Padriga Street makahatag og alternatibong agianan sa mga sakyanan, makapauswag sa mobility ug makapamenos sa oras sa biyahe alang sa mga commuters nga adlaw-adlaw nga moagi.
Niadtong 2019, gibawi sa administrasyon ni kanhi Cebu Governor Gwendolyn Garcia ang kontrol sa mga kabtangan sa probinsya sa labing menos lima ka access road padulong sa Cebu IT Park.
Kini niresulta sa pagsira sa mga access road sa Gov. Cuenco Ave., usa niini sa V. Padriga St., duol sa mga bodega sa National Food Authority.
Niadtong 2015 nga si kanhi Bise Gobernador Hilario Davide III mao pa ang Gobernador, nihatag kini og perpetual roads right-of-way (RROW) sa Cebu Property Ventures and Development Corp. (CPVDC), nga nagdumala sa IT Park.
Naglakip kini sa access sa probinsya sa W. Geonzon St. ug RROW sa tanang karsada ug common areas sulod sa IT Park aron mahatagan og access ang Filinvest Cyberzone Cebu (FCC).
Ang FCC usa ka joint development project sa probinsya ug Filinvest Land Inc. panahon sa termino ni Garcia isip gobernador niadtong 2012.
Ang proyekto nahimutang sa 12,000-metro kwadrado nga luna nga gipanag-iya sa probinsya sulod sa Cebu IT Park.
Pinaagi sa usa ka Memorandum of Agreement tali sa Ayala-led CPVDC ug sa Cebu Provincial Government ubos ni Garcia niadtong Septyembre 23, 2019, epektibong natapos ang RROW. Matod pa ni Garcia kaniadto nga ang MOA sa 2015 wa makabenepisyo ang probinsya ug sa pagtapos niini, ang provincial government nakahukom sa pagpalambo sa maong mga luna. / EHP