Giaprubahan sa Hunta Probinsyal sa Sugbo ang paghatag og katungod sa tulo ka tawo sa Kapitolyo nga gusto ni Cebu Governor Pamela Baricuatro nga maoy mopirma sa mga dokumento nga gikinahanglan ugaling wala siya sa iyang opisina.
Kini mao sila si Atty. Ace Durano ang Provincial Administrator, Provincial Assistant Administrator nga si Aldwin Empaces, ug Chief of Staff nga si Paolo Uy.
Ang maong resolusyon gipangamahanan ni ex-officio member Celestino “Tining” Martinez atol sa regular session niini sa Agusto 4, 2025.
Matod ni Martinez nga ang hangyo sa gobernador, gi-certify as urgent.
Naglakip sa mga request sa gobernador mao ang pagpirma sa mga dokumento sama sa maintenance, kuryente, internet connection, ug uban pa.
Atol sa diskusyon gihangyo ni Bokal Nilo Seno gikan nga mahatagan og katin-awan ang hangyo sa gobernador gumikan sa probisyon ubos sa local government code nga adunay gitagana nga adlaw nga makapirma ang mga gitudlo apan kon molapas na sa 30 ka adlaw ang bise gobernador na ang mopirma niini. / ANV