Gipahibalo ni Provincial Administrator Atty. Joseph Felix Mari “Ace” Durano sa Miyerkules, Hulyo 23, 2025, nga adunay 18 porsiyento nga pag-ubos sa tourist arrivals sa mga Korean nationals dinhi sa Sugbo base sa datos sa unang unom ka buwan sa 2025.
“2025 arrivals from Korea to Cebu is 18 percent decrease from 2024 so that’s the current arrival karon,” matod ni Durano sa Hulyo 23.
Gilantaw kini ni Durano nga nagkinahanglan og dali nga alibyo ilabi na nga dako og ikatampo ang kita sa turismo sa paglambo sa lalawigan.
“And to me this needs to be addressed immediately kay sa akong time sa DOT (Department of Tourism) I’ve never seen anything like that nga kanang ingun ana nga drastic drop. So there really has to be something happening in the market that we need to address as soon as possible,” dugang niya.
Sumala ni Durano, nag-una sa International market ang South Korean Nationals nga gisundan sa Japanese tourists.
Hinungdan nga gilantaw niini ang pag-overhaul o pag-usab sa mga tourism programs sa probinsiya nga mo-align sa target market aron daghan ang maagni nga mobisita sa Sugbo.
Subay sa Tourism market intelligence, gikonsiderar nga dakong competitor ang Vietnam nga nagtanyag og mas baratong mga tourist packages, efficient transactions, agresibong market promotions, ug destination developments.
“Naay mga changes sa market behavior nga we should adopt to make it more attractive. Like for example Koreans when they travel abroad they don’t carry cash anymore. They use payment system which we are not adopting pa here,” matod ni Durano.
Ang pag re-program sa tourism initiatives sa probinsiya maoy inisyal nga sulbad sa bag-ong administrasyon aron mapalambo ang turismo.
Gipahibalo ni Durano nga ang Suroy Suroy sa Sugbo nga adunay tourism activities, kinahanglan nga susihon pag-usab nga mosentro gyud sa pag-promote sa destinasyon.
“Kon atong tan-awon ang kanang Suroy Suroy promotion ang ato lang siguruon nga inig reprogram nato ang destinasyon ang ma-promote dili ang tawo. Kay ang turista dili man moanhi’g Cebu tungod sa usa ka tawo tungod man sa atong attraction, sa atong destination so mao nay ato i-focus,” matod ni Durano.
Sa Hulyo 30, gikatakda nga ipahigayon ang Provincial Tourism Council meeting nga tambungan sa mga business sector lakip ang Department of Tourism ug uban pang local government agencies.
Kini nga tigom mahinungdanon sanglit hisgutan niini ang mga interventions nga himuon alang sa mga nakitang kakulian sa turismo sa Sugbo. / ANV