Pipila na lang ka adlaw sa dili pa ang midterm elections, nangabot na kagahapon , Mayo 6, 2025, ang mga Automated Counting Machines (ACMs) sa tanang local government units (LGUs) sa Lalawigan sa Sugbo sumala ni Commission on Elections (Comelec) Cebu Provincial Office.
Si Atty. Michael Sarno, Cebu Provincial Election Officer nitug-an sa SunStar Cebu nga nahatod ang tanang mga ACM nga way problema.
Ang mga election paraphernalia, lakip na ang mga official ballot ug ubang and kagamitan ang ipanghatod sa mosunod nga mga adlaw sa di pa ang adlaw sa eleksyon, Mayo 12.
Matod niya nga ang testing ug final sealing sa makina gihimo sa Mayo 6 ug 7 pagseguro sa kaandam sa ACM ug familiarity sa mga electoral board member atol sa adlaw sa eleksyon.
Ang proseso, naggamit sila og napulo ka actual ballots sa matag makina ug gipasulod sa ACMs aron maseguro nga nag-andar kini.
Pagkahuman gisilyuhan da-yon hangtod sa adlaw sa eleksyon.
Apan gitataw ni Sarno nga kini alang lang sa testing purposes ug dili makaapektar sa opisyal nga resulta.
Dinhi sa Dakbayan sa Sugbo, gisugdan kagabii Mayo 6, 2025, ang pag-andam sa mga Automated Counting Machine ug gitapok kini sa Plaza Independencia sa kaadlawon aron nga ihatod sa polling centers alang sa final testing and sealing.
Matod ni Police Lieutenant Colonel Maria Theresa Mactangay, deputy city director for operation sa Cebu City Police Office (CCPO) nga andam na ang ilang 382 ka personnel nga mohatod sa maong mga ACM lakip na sa mga battery, ballot boxes ug ubang election paraphernalia.
Hugot nga seguridad ang ipa-tuman sa maong pagpanghatod sa ACMs ngadto sa 73 ka polling centers sa tibuok Dakbayan sa Sugbo.
Giklaro ni Macatangay nga dili na mouli ang mga polis hangtod sa pagtapos na sa election sa Mayo 12, 2025.
Gibutyag ni Macatangay nga dunay 73 ka mga polling centers ang Dakbayan sa Sugbo ug ang labing daghan nahimutang sa bukirang barangay sa siyudad.
Ang minimum nga i-deploy sa CCPO sa matag polling centers moabot sa upat ka mga police personnel.
Apan dunay dagko nga mga polling centers diin daghan usab ang mga botante nga hatagan nila og daghan nga mga polis nga ilang i-deploy. / EHP / AYB