Ang bigman nga si Steven Adams nisugot sa usa ka three-year, $39 milyones nga extension sa kontrata aron magpabilin sa Houston Rockets, sumala sa usa ka tawo nga pamilyar sa kasabutan nga nakig-estorya sa The Associated Press.
Si Adams, nga gilauman untang mahimong unrestricted free agent karong Hunyo 30, naapil sa Rockets human sa usa ka trade gikan sa Memphis niadtong Pebrero 2024.
Wala siya kaduwa sa tibuok 2023-24 season tungod sa pagka-recover sa knee surgery, apan nakabalik siya karong season. Si Adams nag-average og 3.9 ka puntos ug 5.8 ka rebounds sa 58 ka regular-season nga duwa.
Si Adams nahimong importante nga kontribyutor sa playoffs, diin siya nitali og 22.1 ka minutos matag duwa uban sa 5.7 ka puntos ug 6.6 ka rebounds.
Ang 31-anyos nga taga-New Zealand nakadula na og 11 ka NBA seasons, iyang unang pito ka tuig ubos sa Oklahoma City. / RSC