WAY panagana ang gidudahang drug addict nga nanumbag ngadto sa responding team sa Liloan Police Station human siya gialarma nga nag-wild niadtong ala 1:30 sa kaadlawon, Martes, Agusto 12, 2025, sa Sitio Cumpang 3, Barangay Yate, Lungsod sa Liloan, Cebu.
Giila ang suspek nga si Richard Tagalog, 44, residente sa naasoy nga dapit, gikataho nga sabog niadtong tungora.
Gibutyag ni Police Chief Master Sgt. Arni Goc-ong, imbestigador sa Liloan Police Station nga nakadawat sila og tawag nga adunay lalaki nga nag-wild.
Nitubag sa alarma sila si PSSGT Roland Galo uban ni Patrolman Sarobosing.
Pag-abot sa area, giduol ni Galo si Tagalog ug nagpaila nga polis ug gipakalma.
"Kining suspek ni-demand man ngadto kang PSSGT Galo nga hulaman niya iyang M16 rifle. Mao nga niatras kay lain na kaayo’g taras ang suspek ug gisumbag si PSSGt. Galo," matod ni Goc-ong.
Niduol si Patrolman Sarobosing aron nga pugngan sa iyang gihimong pagpanumbag ang suspek ug siya na sab ang giatubang ug gisuwayan sab og sumbag.
Maayo na lang nga nakalihay si Sarobosing apan giusban na sab og sumbag si PSSGT Galo nga naigo sa nawong hinungdan nga nasarasay.
Giyak-an sa suspek si PSSGT Galo ug nag-ilogay sa rifle.
Tungod niini, si Patrolman Sarabosing nipusil sa suspek og naigo sa paa. Ang suspek gidali sa pagdala sa Danao City District Hospital ug gibalhin sa Vicente Sotto Memorial Medical Center, sa Cebu City.
Samtang si PSSGT Galo, nagpakurasyon sa iyang na-angkon nga samad ug bun-og resulta sa lamok-lamok.
Saysay ni PCMS Goc-ong nga ang suspek gihulagway nga sabog nikatkat sa gate sa usa ka panimalay sa ilang silingan hinungdan nga nalisang ang tagbalay ug nanawag og polis.
Kasong direct assault ug resistance and disobedience to a person in authority ang ipasaka sa kapulisan batok sa suspek. / GPL
